Almatyda jas tilshiler forýmy ótedi
ALMATY. 28 naýryz. QazAqparat - Almatyda 29 naýryz kúni Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetinde oqýǵa túsýshi talapkerlerdi qoldaý maqsatynda «Jýrnalıst bolǵyń kele me?» atty jas tilshiler forýmy ótedi.
Sharanyń uıymdastyrýshylary - Ál-Farabı atyndaǵy QazUÝ men «Ulan» respýblıkalyq balalar men jasóspirimder gazeti. Forýmnyń maqsaty - talapkerlerdiń shyǵarmashylyǵyn damytýǵa múmkindik berý arqyly olarǵa jýrnalıstıka fakýltetin tanystyrý bolyp tabylady.
Bıyl jas tilshiler forýmyna elimizdiń 11 oblysynan 15 jeńimpaz qatyspaq. Olar 85 talapker arasynan aqpan-naýryz aılarynda ótken shyǵarmalar baıqaýynda iriktelingen bolatyn. Forým barysynda Ál-Farabı atyndaǵy QazUÝ men «Ulan» respýblıkalyq balalar men jasóspirimder gazeti jeńimpazdarǵa syılyqtar tabystap, dıplomdarmen marapattaıtyn bolady.
