Almatyda jas sýretshiler kórmesi ashyldy
ALMATY. Qyrkúıektiń 10-y. QazAqparat /Erbol Turymbetov/ - Keshe Almatydaǵy Kórkemóner kórmesi jáne aýktsıon dırektsııasy zalynda «Jas óner» atty jas sýretshiler kórmesi ashyldy, dep habarlaıdy QazAqparat.
Ony «Altyn kún» qoǵamdyq qory men Kórkemóner kórmesi jáne aýktsıon dırektsııasy birlese uıymdastyryp otyr Sharanyń negizgi maqsaty jas avtorlarǵa óz eńbekterin kópshilikke keń kólemde kórsetý jáne olardy qoldaý men básekelestikke qabilettilikterin arttyrýǵa baǵyttalǵan.
«Munda buryn-sońdy esh jerde jarııalanbaǵan jumystar qoıylǵan. Mundaǵy jumystardyń kópshiligi T. Júrgenov atyndaǵy Qazaq óner akademııasy stýdentteriniń qolynan shyqqan. Bul ónimder teriniń ár túrine salynǵan, akvareldi kartınalar men fotosýretter. Bul ekspozıtsııalar kórermenderdiń Qysqy Azııa oıyndary aldynda erekshe yqylasyn týdyrady dep senemin. Sonymen birge, jumystar estelik buıym retinde de qoldanyla beredi», deıdi «Altyn kún» qoǵamdyq qorynyń prezıdenti Erkebulan Kenjebolatov. Onyń aıtýynsha, kez kelgen kórermen ózine unaǵan týyndyny satyp ala alady. Al baǵalaryn avtorlary qoıady.
