Almatyda jas sportshylarǵa velosıpedter tartý etildi (FOTO)
ALMATY. QazAqparat- Búgin Ortalyq mádenıet jáne demalys saıabaǵynda ornalasqan Almaty velotreginde 45 jas veloshabandozǵa saltanatty jaǵdaıda velosıpedter tabys etildi. Bul sharaǵa Raimbek kompanııalar toby, Almaty Bro Team sport komandasy jáne basqa da áýesqoı velosıpedshiler tarapynan qoldaý kórsetildi.
«Sporttyń damýyna qoldaý kórsetý - bul kez-kelgen bıznestiń áleýmettik jaýapkershiligi. Kez-kelgen iri kompanııa qoǵamdyq ómirge belsene aralasyp, sporttyń damýyna qoldaý kórsetýi kerek», - dedi Raimbek holdıngi tamaq dıvızıonynyń bas dırektory Vıtalıı Borkov.
Velosıpedterdi tartý etý rásimine Qazaqstannyń velosıped sportynyń ardagerleri: QR velosport federatsııasynyń burynǵy atqarýshy dırektory Aleksandr Antyshev, velojarystan álem birinshiliginiń qola júldegeri, QazKSR eńbek sińirgen jattyqtyrýshysy Vladıslav Kýharskıı, ardagerler arasynda ótken 2013 jylǵy Olımpıada chempıony Alekseı Abramenko qatysty.
«Biz velosıped sportyna balalardy kóptep tartýǵa daıynbyz. Bul úshin olarǵa velosıpedter jáne basqa da kerek-jaraqtar qajet bolady. Al búgin bizge syıǵa tartylǵan velosıpedtermen bizdiń klýbtyń eń jas sportshylary jattyǵatyn bolady. Biz bıyl Pervomaıskıı yqsham aýdanynda, «Suńqar» shańǵy tramplınderi kesheninde jáne Kóktóbede velosıped sporty mektebin ashatyn bolamyz», - dedi A. Vınokýrov atyndaǵy veloklýbtyń dırektory Aleksandr Makenshın.
