Almatyda jas saıasattanýshylar memlekettik til men ulttyq mádenıetti damytý máselelerin talqylaýda
ALMATY. Tamyzdyń 18-i. QazAqparat /Názıra Eleýhan/ - Almatyda saıasattanýshylardyń jazǵy mektebi aıasynda "Qazaqstandaǵy ulttyq mádenıetti jáne memlekettik tildi damytýdaǵy saıası zertteýlerdegi máseleler men perspektıvalar" atty respýblıkalyq ǵylymı-tájirıbelik konferentsııa ótip jatyr,
dep habarlaıdy QazAqparat.
Abaı atyndaǵy Ulttyq pedagogıkalyq ýnıversıtettiń jáne Qazaq gýmanıtarlyq-saıası konıýnktýra ortalyǵynyń uıymdastyrýymen ótip jatqan konferentsııa jumysyna jeke jáne memlekettik oqý oryndarynyń ókilderi, ǵylymı-zertteý jáne saraptamalyq qurylymdar, sondaı-aq úkimettik emes uıymdar qatysýda.
Konferentsııada Qazaqstandaǵy ulttyq mádenıet pen memlekettik tildi damytýdyń perspektıvti joldary, saıası zertteýlerdegi máseleler, saıası zertteýlerdegi ádister men ádisteme ǵylymy talqylanýda.
"Álemdik tájirıbede jáne ulttyq qurylys teorııasynda saıası ultty qalyptastyrýda memlekettik til men ulttyq mádenıet basty elementter bolyp tabylady. Qazaqtar eldiń memleket qurýshy ulty bolyp sanalǵandyqtan, Qazaqstanda turyp jatqan barlyq basqa ulttar memlekettiń qazaq tilin bilýge qoıyp otyrǵan talabyn durys túsinýi qajet. Reseıde orys tilin bilmeýdi, ne bolmasa Germanııada nemis tilinde sóılemeýdi, Frantsııada frantsýzsha sóılemeýdi kóz aldyńa elestetý qıyn", dep atap ótti konferentsııa barysynda Qazaq gýmanıtarlyq-saıası konıýnktýra ortalyǵynyń prezıdenti Esenjol Alııarov.
Abaı atyndaǵy Ulttyq pedagogıka ýnıversıtetiniń saıasattaný kafedrasynyń professory Saıyn Borbasovtyń aıtýynsha, memlekettik tildi orys tiliniń damý deńgeıine deıin kóterý kerek. "Qazaq tilinde aýyldy jerler men aýdandarda sóıleıdi, al halyqtyń kóp shoǵyrlanǵan iri qalalarynda kópshiligi orys tilin qoldanady. Mundaı teńsizdik jaǵdaı til máselesinde orynsyz jaǵdaılarǵa ákeledi", dep atap ótti ol.
Ol sonymen qatar, "Táýelsiz el bolǵaly beri elimizde 2 200 meshit salynyp, qazaq tilinde oqytatyn 890 mektep ashylǵanyn" atap ótip, "búgingi tańda 7 300 jalpy bilim beretin mektep bolsa, onyń 4 000-y qazaq tilinde oqytady. Tirkeýde turǵan 8000 BAQ-nyń 800-i ǵana memlekettik tilde habar taratyp, jazyp otyr", dep qynjylysyn bildirdi. Ol sondaı-aq, búginde tabys kózi sanalatyn jarnamanyń kóbine orys tilinde beriletinin aıta kelip, qazaqtildi BAQ-tar básekege qabiletsiz bolyp otyr dep atap ótti.
