Almatyda jas rejısser Farhat Sháripovtyń alǵashqy kınosynyń premerasy ótedi
ALMATY. Tamyzdyń 12-i. QazAqparat /Názıra Eleýhan/- Almatyda jaqyn arada Sh.Aımanov atyndaǵy "Qazaqfılm" AQ -da túsirilgen «Qyzǵylt qoıan týraly ańyz» atty jańa fılmniń premerasy bolady.
Jas rejısser Farhat Sháripovtyń bul debıýttik fılmin kóptegen jýrnalıster "jyldyń kópten kútken premerasy bolmaq" dep paıymdaýda.
Fılm aýyl balasynyń qalanyń túngi ómirine engen aýyr taǵdyry jaıynda. Stýdent bala "jeńil" ómirdiń shyrmaýyna túse me, qala ómirinde óz-ózin saqtaı ala ma - bunyń barlyǵyn kórermender shyǵarmanyń sońynda bile alady. "Men túsirilimdi bastamaı turyp stsenarııdiń artyq, kem jerlerin túzeý úshin, kóp adamdarǵa kórsetip, pikirlerin bildim. Túsirý sońyna deıin tańdaǵan ustanymym boıynsha júrýge tyrystyq", dedi Farhat Sháripov.
Tamyzdyń 29-y kúni ótetin premeraǵa elimizge belgili mádenıet qaıratkerleri, tanymal akterlar men rejısserlar, prodıýsserler men otandyq shoý-bıznestiń juldyzdary, sonymen qatar, fılmniń túsirý toby men kınostýdııanyń basshylary qatysady.
Farhat Sháripov 1983 jyly týǵan, T.Júrgenov atyndaǵy Ulttyq Óner akademııasyn (rejıssýra, dybys rejıssýrasy) jáne "New York Film" Akademııasyn (film making) qyzyl dıplommen támamdaǵan. Ol búginde prodıýser, rejısser, stsenarıst. «Sur qarlyǵash» jáne «Temirjol baqylaýshysy» kartınalarda jumys istegen.
