Almatyda jas prozashylar stýdııasy ashyldy
ALMATY. 20 qazan. QazAqparat /Názıra Eleýhan/ - Almatydaǵy «Bóbek» ulttyq ortalyǵynda 9-15 jastaǵy daryndy balalarǵa arnalǵan «Proza» shyǵarmashylyq stýdııasy ashylyp, óz jumysyn bastap ketti.
Esterińizge sala ketsek, buǵan deıin elimiz boıynsha osy stýdııaǵa qatysýǵa baıqaý jarııalanǵan bolatyn. Sonyń nátıjesinde respýblıka boıynsha eń úzdik shyǵarma jazǵan 50 bala iriktelinip alyndy. Endi bir apta boıy elimizdiń túkpir-túkpirinen kelgen jas qalamgerler tanymal aqyn-jazýshylardyń sheberlik synyptaryna qatysyp, qalamdaryn ushtaıtyn bolady. Sonymen qatar, olar súıikti jazýshylarymen kezdesedi.
Uıymdastyrýshylardyń aıtýynsha, bunymen qatar, baǵdarlama aıasynda QR-nyń tarıhı-mádenı qundylyqtary men ádet-ǵuryptaryna súıene otyryp, jasóspirimder arasynda rýhanı-adamgershilik tálim-tárbıe jumystary, áleýmettik ahýaly nashar otbasynan shyqqan daryndy balalarǵa kórkem ádebıetten sapaly bilim berý, jeke jáne ujymdyq jumystar arqyly balanyń shyǵarmashylyǵyn damytý jumystary qarastyrylǵan.
«Proza» stýdııasy áleýmettik ahýaly nashar otbasynan shyqqan daryndy balalarǵa tulǵa bolyp qalyptasýyna qoldaý kórsetý jáne balalar shyǵarmashylyǵyna qoǵam nazaryn aýdarý maqsatynda arnaıy uıymdastyrylyp otyr", - dedi «Bóbek» ulttyq ortalyǵynyń bas dırektory qyzmetin atqarýshy Qorlan Jampeıisova.
Onyń aıtýynsha, balalar shyǵarmashylyqtaryn jetildirý barysynda stýdııada QR Táýelsizdiginiń 20 jyldyǵyna arnalǵan shyǵarmalar jazatyn bolady. "Stýdııa jumysynyń sońynda daryndy balalardyń úzdik jumystary iriktelip, jaqynda bizdiń ortalyqta shyǵatyn «Meıir» jýrnalyna jarııalanbaq. Sharanyń ár qatysýshysyna «Bóbektiń» sertıfıkaty tabystalady", - dedi ol.
