Almatyda «Jas otaý» neke saraıy men «Almaty aqshamy» gazetiniń birlesken jobasymen neke qııý saltanaty ótedi
ASTANA. 15 naýryz. QazAqparat - Ulystyń uly kúni qarsańynda, 17 naýryzda Almatydaǵy «Jas otaý» neke saraıy men «Almaty aqshamy» gazetiniń birlesken jobasy negizinde neke qııý rásimi ótedi, dep habarlady «Almaty aqshamy» gazetiniń baspasóz qyzmeti.
Neke qııý - ár halyqtyń eń qasterli merekeleriniń biri. Sonyń ishinde, qazaq halqynda kóktem shyǵyp, kókmaısa ósip, jer aıaǵy keńigende jastar shańyraq kóteretin ertedegi dástúr bar. Qazaqtyń ulttyq merekelerin, otbasylyq qýanyshtaryn Naýryz merekesimen oraılas atap ótý búginde ult jadynan umyt bola bastady.
Osy kóne, ozyq dástúrlerdi jańǵyrtý maqsatynda «Jas otaý» neke saraıynyń ákimshiligi «Almaty aqshamy» gazetiniń qyzmetkerleri, jas tilshiler Dýman Anash pen Áıgerim Saýytbektiń neke qııý rásimin ulttyq dástúrler negizinde saltanatty túrde atap ótýdi uıǵaryp otyr.
Atalǵan is-sharada «Jar-jar», Abaıdyń «Kózimniń qarasy», «Aqqý», «Kóńilashar» kúıleri, ájeniń jastardy til men kózden alastaýy, Jer-Anaǵa, Ot-anaǵa táý etýi, Qydyr atanyń aq batasyn arnaýy sııaqty teatrlandyrylǵan kórinister qoıylady. Sonymen qatar, ulttyq dám - baýyrsaq pen Naýryz kójeden, shubattan dastarhan máziri jasalady.
«Atańnan mal qalǵansha, tal qalsyn» degendeı, eń bastysy, qos jup Neke saraıynyń aýlasyndaǵy mahabbat alleıasyna jas shybyq otyrǵyzady.
