Almatyda jas medıtsına mamandary turǵyn úı sertıfıkattaryn aldy
ALMATY. QazAqparat - Almatyda eńbek jolyn endi bastaǵan medıtsına qyzmetkerleri baspananyń alǵashqy jarnasyna sertıfıkattar aldy. Bul týraly Almaty aýmaqtyq kásipodaqtar birlestigi ótkizgen arnaıy baspasóz máslıhatynda aıtyldy, dep habarlaıdy QazAqparat tilshisi.
«Almatyda jarty jyl ishinde 40 myńǵa jýyq jumys berýshi shamamen 150 myń qyzmetkerdiń jalaqysyn úshten bir bólikten astamǵa ósirdi. Al eńbek jolyn endi bastaǵan medıtsına qyzmetkerleri úı satyp alý kezinde bastapqy jarnany tóleý úshin turǵyn úı sertıfıkattaryn alyp jatyr. Sonymen qatar, 500 turǵyn sot jáne quqyqqorǵaý organdarynyń aralasýynsyz «Tatýlasý ortalyǵy» qyzmetine júgine otyryp, óz daýlaryn sheshti», - dedi Almaty aýmaqtyq kásipodaqtar birlestiginen.
Almaty aýmaqtyq kásipodaqtar birlestiginiń tóraıymy Záýresh Ómirbaeva alǵashqy jartyjyldyqtaǵy kásipodaq jumysyn qorytyndylaı kele, qyzmetkerlerdiń jumys jaǵdaıyn jaqsartý boıynsha jumystar keshendi túrde júrgizilip jatqanyn atap ótti.
«Búginde Almaty Kásipodaqtar ortalyǵy 200 myńnan astam kásipodaq múshesiniń basyn qosqan iri qoǵamdyq uıymdardyń biri bolyp sanalady. Eńbek etýshilerdiń quqyǵyn qorǵap, týyndaǵan daýlardy sheshýge atsalysyp, 750 bastapqy kásipodaq uıymy jumys berýshiler men qyzmetkerlerdiń arasynda kópir bolyp júr. Qyzmetkerlerdiń qajettilikterin eskere otyryp, olardyń múddesin qorǵaýǵa tyrysyp kelemiz», - dedi ol.
Kásipodaqtar ortalyǵy jalaqynyń ósýi, ujymdyq kelisimshart jasasý, bastapqy kásipodaq uıymdaryn qurý, eńbek qaýipsizdigi, áleýmettik seriktestik máselelerine basa nazar aýdardy.
«Ujymdyq kelisim shartqa jasasýdyń arqasynda jumysshylar jeńildikter men kepildemelerge ıe bolady. Qujatqa sáıkes qyzmetkerler eńbek quqyǵyn qorǵaý, jalaqy, emdelý jáne demalý boıynsha áleýmettik kepildikke ıe bolady. Jyl basynan beri 25 myńnan asa ujymdyq kelisim jasaldy. Sonymen qatar rásimdelmegen eńbek qatynasyn boldyrmaý maqsatynda «Eńbek shartyn jasańyz» respýblıkalyq aktsııasy bastaldy. Baǵdarlamany júzege asyrý úshin «shuǵyl jeli», «senim telefony» ashylyp, halyq kóp jınalatyn oryndarda «Senim jáshikteri» ornatyldy. Birinshi jartyjyldyq ishinde memınspektorlar 8 mekemeni tekserip, eńbek shartynsyz jumys jasap júrgen qyzmetkerlerdi anyqtady. Nátıjesinde, 149 eńbek kelisimsharty jasaldy», - dedi Záýresh Ómirbaeva.
Sondaı-aq, baspasóz máslıhatynda mekemelerde bastapqy uıymdardy ashýdyń mańyzdy ekendigi atap ótildi. Óıtkeni olar qyzmetkerlerdiń máselelerin sheshýmen aınalysady. 2019 jyly 6 aıda 10 bastapqy kásipodaq uıymy qurylyp, 4,1 myń adam múshelikke tartylǵan.
«Kásipodaqqa múshe bola otyryp jumysshy, eń aldymen, áleýmettik-ekonomıkalyq jeńildikterge ıe bolady. Munda tegin zań qyzmeti, kepildikter men kompensatsııalar, biliktiligin arttyrý men jalaqysy joǵary ózge laýazymǵa aýysý múmkindigine qol jetkizedi. Odan bólek, jumystan shyǵarylǵan nemese ózge de ádiletsiz jaǵdaılarda kásipodaq jumysshyny qorǵaýǵa daıyn. Ómirlik qıyn jaǵdaılarǵa tap bolǵandarǵa materıaldyq kómek, sanatorıı-kýrorttyq em qabyldaýǵa jeńildikpen joldama alýǵa kómek kórsetedi», - dedi Almaty aýmaqtyq kásipodaqtar birlestiginiń tóraıymy.
