Almatyda jas matematıkter marapattaldy
ALMATY. QazAqparat - Almatyda respýblıkalyq «Bastaý» týrnıri ótti. Bul baıqaýda Qazaqstandaǵy eń úzdik matematık oqýshylar marapattaldy, dep habarlaıdy QazAqparat tilshisi.
QR Tuńǵysh Prezıdenti qorynyń bastamasymen 2-4 synyp oqýshylary Nazarbaev Intellektýaldy mektebiniń bazasynda eki kún boıy matematıkalyq bilimin synady.
Uıymdastyrýshylardyń aıtýynsha, týrnır balalardyń matematıkalyq bilimderin nyǵaıtyp, qoldaýǵa baǵyttalǵan.
«Barlyq tapsyrmalar matematıkalyq logıkaǵa súıenip jasaldy. Bul tapsyrmalardy sheshý balany durys qorytyndy shyǵarýǵa, durys sheshim tabýǵa kómektesedi», - dedi uıymdastyrýshylar.
Komanda jetekshileri - bastaýysh synyp muǵalimderi de bos qarap otyrǵan joq. Olarǵa arnap «Bastaýysh mektep oqýshylaryna standarttan tys matematıkany úıretý» oqý trenıngi júrgizildi.
Bas júldeni Nur-Sultan qalasy №1 mektep-gımnazııasynyń oqýshysy Ańsar Qabdolla aldy. 1,2,3-oryndardy Almatydaǵy №140 mektep gımnazııasynyń oqýshysy Ásel Jumaǵalıeva, Astana halyqaralyq mektebiniń oqýshysy Jáńgir Bolat ıemdendi.
