Almatyda «Jas Qyran» fýtbol mektebi ashylady
ALMATY. QazAqparat - 20 qazan kúni Almatyda «Jas Qyran» balalar-jasóspirimder fýtbol ortalyǵynyń saltanatty ashylý rásimi bolady, dep habarlaıdy QazAqparat «SPORTINFORM»-ǵa silteme jasap.
Ortalyq búkil Almatydaǵy Qazaqstanǵa tanymal №2 Olımpıada rezerviniń mamandandyrylǵan balalar-jasóspirimder sport mektebiniń (№2 SDıÝShOR) bazasynda quryldy. Munda 6 jastan 18 jasqa deıingi 500-ge jýyq bala jattyǵady. Budan tys, balalar mektepke deıingi arnaıy oqý baǵdarlamasymen de oqıdy. Oqý-jattyǵý úderisine 25 bapker jumyldyrylǵan.
Zamanaýı oqý-jattyǵý kesheni bar. Stadıon 800 kórermenge arnalǵan oryndyqtarmen qamtamasyz etilgen. Kórermender otyratyn sektordyń tóbesinde shatyr ornatylǵan. Standart ólshemdegi alańǵa sýarý júıesi engizilgen, alań ıtalıandyq tehnologııamen shyǵarylǵan sońǵy býynnyń jasandy kógalymen qaptalǵan. Kógalǵa FIFA sertıfıkaty berilgen. Budan bólek, sport alańqaılary da bar, keshenniń aınalasyndaǵy aýmaq abattandyrylǵan.
«Bul memlekettik-jeke menshik seriktestik baǵdarlamasy boıynsha salynǵan respýblıkadaǵy alǵashqy nysandardyń biri. Ortalyqta balalardyń barlyǵy tegin oqıdy, jattyǵady. Mundaǵy ınfraqurylym da óte jaqsy, tájirıbeli bapkerler sabaq beredi. Ozat ádistemeler Qazaqstanǵa laıyqty fýtbolshylardy tárbıelep shyǵarady degen senim mol. Bul basqa óńirler úshin de úlgi», - deıdi ortalyqtyń bas dırektory Renat Toǵysov.
