Almatyda jas fýtbolshylar A. Gýrmandy eske alýǵa arnalǵan týrnırde baq talastyrdy
ALMATY. 6 qarasha. QazAqparat -Almatyda 2003-2004 jyldary týǵan jasóspirimder arasynda QR eńbek sińirgen sport qaıratkeri Aleksandr Ilıch Gýrmandy eske alýǵa arnalǵan fýtbol týrnıri ótti.
Jarysty onyń týys-týǵandary men dostary uıymdastyrdy.
Ál-Farabı atyndaǵy Qazaq ulttyq ýnıversıtetiniń stadıonynda ótken bul básekege 6 komanda qatysty. Tartysty ótken jarys qorytyndysynda Baýyrjan Sarsekenov jattyqtyratyn «Jeńis» komandasy jeńiske jetip, kýbok ıegeri atandy. Al Ámir Ábdishev baptaıtyn «Qaırat» komandasy ekinshi oryn alsa, Vladıslav Masımov tizginin ustaǵan «Arystan» komandasy úzdik úshtikti túıindedi. Sondaı-aq «jeńistik» Qajymuqan Muqan týrnırdiń eń úzdik oıynshysy atandy. Uıymdastyrýshylar bolashaqta týrnırdi dástúrli jarysqa aınaldyrmaq. Sonymen qatar Qazaqstan fýtbol ardagerleri arasynda da arnaıy týrnır ótkizýdi josparlap otyr.
