Almatyda «Jas erekshelik makýlıarly degeneratsııany emdeýde qoldanylatyn ınnovatsııa soqyrlyqqa jol bermeıdi» atty sımpozıým ótip jatyr
ALMATY. 5 Qarasha. QazAqparat /Názıra Eleýhan/ - Búgin Almatyda «Jas erekshelik makýlıarly degeneratsııany emdeýde qoldanylatyn ınnovatsııa soqyrlyqqa jol bermeıdi» degen taqyrypta sımpozıým óz jumysyn bastady. Oǵan óz elimizdiń jáne Reseı eliniń oftalmolog-dárigerleri qatysýda.
«Sımpozıýmdy ótkizýdiń negizgi maqsaty - jas erekshelik makýlıarly degeneratsııany emdeý boıynsha tájirıbemen almasý, kóz aýrýlarynyń eń aýyr túrlerin emdeýdegi jańa ádis-tásilderdi zerdeleý bolyp tabylady. Osyǵan deıin paıdalanyp júrgen emdeý ádisteri kózdiń kórý úrdisin turaqtandyrý esebinen kómektesýge múmkindik beretin. Qazirgi tańda usynylyp otyrǵan emdeý tásilderiniń ishinde Lýtsentıs dárisin qoldanýdyń bolashaǵy zor. Bul dári kóz kórýiniń údemeli túrde tómendeýin baıaýlatyp qana qoımaı, kórý qyzmetin belgili bir mólsherde qaıda qalpyna keltirýge múmkindik beredi. Bul dári farmatsevtıka salasyndaǵy úlken jetistik», - dep atap ótti QR-nyń bas oftalmology, Kóz aýrýlary Qazaq ǵylymı-zertteý ınstıtýtynyń dırektory, medıtsına ǵylymdarynyń doktory, professor Tursyngúl Botabekova.
Onyń aıtýynsha, Kóz aýrýlary Qazaq ǵylymı-zertteý ınstıtýty JMD kóz aýrýyn keshendi emdeý túri boıynsha metronıdazol dármegin qoldanýymen fototerapııa ádisi úlken jetistikpen tájirıbede qoldanylýda. «Basty nazar otandyq fotosensıbılızatorlardy oılap tabýǵa bólinýde. Jaqynda elimizde ósetin eki uıaly qalaqaıdan alynǵan feofıtın sýtekti eritindisi preparaty klınıkalyq zertteýden ótti», - dedi T. Botabekova. Onyń aıtýynsha, ınstıtýt dıagnostıka jáne emdeýdiń jańa ádisterine ǵana emes, sonymen birge dárilik zattardy tasymaldaý júıesiniń jetilýine de nazar aýdarýda.
