Almatyda jas dızaınerlerdiń xalyqaralyq konkýrsy ótti
ALMATY. QazAqparat - Almatyda "Jas-Órken-2019" jas dızaınerlerdiń VII xalyqaralyq konkýrsy ótti, dep xabarlaıdy QazAqparat tilshisi.
Almaty texnologııa ýnıversıtetiniń jeńil ónerkásip jáne dızaın fakýltetiniń ýıymdastyrýymen baıqaýǵa 36 jas dızaıner qatysty. Saıys stýdentterdiń shyǵarmashylyq áleýetin joǵary deńgeıge kóterýdi maqsat etip otyr.
Saıysqa Qazaqstan, Ortalyq Azııa, Reseı, Qyrǵyzstan elderiniń jas dızaınerleri qatysty. Ataqty dızaınerler - Djeıms Kım(Qytaı), Davide Alesina Maietti(Italııa), Aıda Kaýmenova(Qazaqstan), bıýtı-feshn bloger Oksana Kım (Qazaqstan), KFW quryltaıshysy Botagóz Aldońǵarova (Qazaqstan), professor Natalııa Mokeeva (Reseı) jastardyń múmkindigin baǵalady.
Jańa toptamalar KFW Almaty, KFW Astanada kórsetilýi ábden múmkin. Erekshe kózge túsken jas dızaınerlerdi Aıda Kaýmenova óz komandasyna alyp, birge jumys isteýge qarsy emes ekendigin aıtty.
"Bul salada meniń úlken tájirıbem bar. Jańa oı, pikir, kıimder úlgisine jańashyldyqty ákeletin qýatty jigerli jas dızaınerlermen jumys jasaýǵa árdaıym ashyqpyn", -dedi qazaqstandyq dızaıner Aıda Kaýmenova.
Jeńil ónerkásip jáne dızaın fakýltetiniń dekany Raýshan Jylysbaeva stýdentter 2 kýrs Almatyda bilim alsa, 3-4 kýrsta Italııadan bilimin shyńdap, eki ret dıplom qorǵaıtyndyǵyn aıtty.
"Jas talantty dızaınerlerdi tanystyrý maqsatynda biz bul saıysty jyl saıyn uıymdastyramyz. Italııadaǵy Eýropa dızaın ınstıtýtynyń dırektory Davide Alesina Maiett qazaqstandyq dızaınerlerge qyzyǵýshylyq tanytty", - dedi jeńil ónerkásip jáne dızaın fakýltetiniń dekany Raýshan Jylysbaeva.
