Almatyda jas balet ártisterine arnalǵan tuńǵysh teatr ashyldy
; ALMATY. Qarashanyń 7-si. QazAqparat /Nazıra Eleýhan/ - Qazaq baleti tarıhynda jas balet ártisterine arnalyp ashylyp otyrǵan teatr - bizdiń oqý ordamyzdyń 75 jyldyq mereıtoıyna arnalǵan baǵa jetpes syılyq boldy, dedi teatrdyń ashylý saltanatynda A.V.Seleznev atyndaǵy Almaty horeografııalyq ýchılışesiniń dırektory Qarlyǵash Myrzahanova,
dep habarlaıdy QazAqparat.
«Jańa teatrdyń ashylýy biz úshin, bizdiń oqýshylarymyz úshin úlken qýanysh. Sońǵy 2 jylda Bilim jáne mádenıet mınıstrliginiń, demeýshilerimizdiń arqasynda búgin armanymyz oryndaldy. Halyq bizdiń 2 kúndik esep berý kontsertimizge kelgende, «endi taǵy qashan sizdiń oqýshylaryńyzdyń ónerlerin tamashalaı alamyz» deıtin. Mine endi, kópshilik bizdiń teatrdan talantty balalarymyzdyń ónerlerin kóre alatyn bolady. Biz teatrdy baıaǵydan ashar edik, oǵan ár túrli problemalar sebep boldy», deıdi oqý orynynyń basshysy, dotsent, QR eńbek sińirgen qaıratkeri Qarlyǵash Myrzahanova.
Onyń aıtýynsha, teatrdyń ashylýy- endi qarajatty bireýlerden suramaı, ózimizdiń tabýymyzǵa múmkindik beredi.Osylaısha, az da bolsa qarajat jınap, kerekti zattarymyzdy ala alamyz jáne bı qoıýshylaryn óz elimizden, shet elden shaqyrtýǵa múmkindik týady.
«Ýchılışeniń jetistikteri kún saıyn emes, saǵat saıyn ósýde. Men ózim oqyǵan oqý orynynyń jetistikterin maqtan tutamyn. Túlekterimiz elimizdiń eki birdeı opera jáne balet teatrynda, sonymen qatar AQSh, Avstrııa, Frantsııa, Germanııa, Reseı sııaqty iri memleketterdiń balet sahnalarynda óner kórsetip júr. Búgingi ashylyp otyrǵan teatr oqýshylar men ustazdardyń shyǵarmashylyq izdenýine, balet óneriniń odan ári damýyna yqpal etýge múmkindik beredi», dedi elimizge tanymal baletmeıster Bolat Aıýhanov.
Bul oqý ornynda 360 bala oqıdy. Teatrdyń trýppasy jyl saıyn aýysyp otyrady, onda 100 oqýshy óner kórsetetin bolady. Teatrǵa kirý baǵasy 300 teńge, al balkon 200 teńge. Spektaklder aptasyna 1 ret qoıylatyn bolady. Jalaqy - syıaqy retinde tólenip turady. Elimizde balet bıshilerin daıyndaıtyn birden bir oqý oryny zaman talabyna saı qajetti qural-jabdyqtarmen jaraqtalǵan.
