Almatyda jas astronomdar men bolashaq ǵaryshkerler sleti bastaldy
ALMATY. 20 sáýir. QAZAQPARAT - Búgin Almatyda «Bóbek» ulttyq ǵylymı-praktıkalyq, bilim berý jáne saýyqtyrý ortalyǵy observatorııasynyń (UǴPBSOO) bazasynda jas astronomdar men bolashaq ǵaryshkerlerdiń ashyq sleti bastaldy, dep habarlaıdy UǴPBSOO baspasóz qyzmeti.
Onyń maqsaty - astronomııa, ǵaryshkerlik salasynda mektep oqýshylary biliminiń deńgeıin kóterý jáne olardy halyqaralyq baıqaýlarǵa, olımpıadalarǵa jáne týrnırlerge qatysýǵa daıyndaý.
Slette el mektepteriniń 7-11 synybynyń pán úıirmelerinde belsendi daıyndalyp júrgen, astronomııa jáne ǵarysh baǵyttary boıynsha baıqaýlardyń jeńimpazy bolǵan 130 oqýshysy, sondaı-aq, respýblıkalyq astronomııalyq praktıkýmniń qatysýshylary qatysýda.
Slet sheńberinde ǵarysh astronomııasy jáne fızıka boıynsha olımpıada, ǵylymı jobalar baıqaýy ótedi. Myqtylardy anyqtaý jáne qorytyndylardy shyǵarý jarııalanǵan eki is-shara boıynsha bólek ótkiziledi. Olımpıadalyq baıqaý baǵdarlamasy eki týrdan turady. Teorııalyq týrda jas astronomdar qosymsha bilim men biliktiligi deńgeıin anyqtaýǵa arnalǵan esepterdi shyǵarady. Praktıkalyq týr qatysýshylardyń juldyzdy aspandy bilýine negizdelgen.
Qazylar quramynda tanymal astronom-ǵalymdar jáne fızıkter, QR Ulttyq ǵarysh agenttiginiń ókilderi bar.
Slet qatysýshylaryn bilim saıysy ǵana emes, sonymen qatar qyzyqty mádenı baǵdarlamalar - ǵalymdarmen jáne ǵaryshkerlermen kezdesýler, Astrofızıka ınstıtýtyna jáne Tıan-Shan bıik taýlaryndaǵy observatorııaǵa serýen, qala boıynsha saıahat jáne basqa is-sharalar kútýde. Slettiń ashylýy álemniń kóptegen elderinde búgin, 20 sáýirde atap ótiletin Halyqaralyq astronomııa kúnine oraılastyrylǵan.
