Almatyda jas ana 20-qabattan sekirmek boldy
ALMATY. QazAqparat – Almaty polıtseıleri turǵyn úıdiń 20-shy qabatynan sekirmek bolǵan jas anany qutqardy, dep habarlaıdy QazAqparat tilshisi.
Almaty polıtsııasynyń «102» pýltine «Manhetten» turǵyn úı kesheniniń turǵyndarynan habarlama túsken. Olar úılerdiń biriniń 20-qabatynda dálizdegi balkonnan aıaǵyn syrtqa salbyratyp otyrǵan áıel týraly aıtqan. Kórsetilgen mekenjaıǵa dereý Býran-080 patrýldik toby attanǵan. Oqıǵa ornyna jetken polıtsııa aǵa leıtenanty Saıat Bekjanov pen polıtsııa podpolkovnıgi Nursultan Bektursyn bul aqparatty rastap, ǵımarattyń 20-qabatyna kóterilgen.
«Birden shara qoldanýǵa kóshtik. Oǵan aqyryn jaqyndadyq: áıel balkonnyń shetinde otyr eken. Janynda bala arbasy turdy, ishinde kishkentaı sábı jatty. Kórshi úıdiń turǵyndary áıeldiń nazaryn ózderine aýdaryp, mundaı sheshimnen bas tartýyn ótinip jatty. Jaǵdaıdy baǵalaı otyryp, júgire janyna jettik te, balkonnan ishke túsirip aldyq. Jaǵdaıdy suraǵanymyzda áıel eshteńe aıta almaı, jylady. Men ony qushaqtap, jubatýǵa tyrysqanymda, ol qatty jylaı bastady. Onyń problemasy bolǵany anyq. Eń bastysy, jas ana men onyń alty aılyq balasy qutqaryldy», - dedi Almaty qalalyq jol-patrýldik qyzmetiniń polıtseıi Saıat Bekjanov.
Belgili bolǵandaı, áıeldiń jasy – 26-da, alty aılyq balasy bar, turmysqa shyqqan. Kúıeýi basqa qalada jumys isteıdi. Qazir polıtsııa jas ananyń mundaı áreketke barýyna ne sebep bolǵanyn anyqtap jatyr. Sondaı-aq, onymen psıholog jumys isteýde.
