Almatyda jarys kezinde 25 jastaǵy jigit kóz jumdy
ALMATY. QazAqparat – Almatyda ekstremaldy júgirý báıgesinde 25 jastaǵy áýesqoı sportshy Dáýlet Beısenbaev kóz jumdy. Qaıǵyly oqıǵanyń mán-jaıyn Adrenaline Nomad Race jobasynyń uıymdastyrýshysy aıtyp berdi, dep habarlaıdy QazAqparat tilshisi.
Jobanyń uıymdastyrýshysy Elmıranyń aıtýynsha, sportshy jarystyń bas kezinde-aq dıstantsııadan shyǵyp ketken.
«Bul oqıǵa jarystyń aıaǵynda nemese ortasynda emes, basynda boldy. Jańadan júgirýge kiriskende 9-kedergiden ótip jatqan qyzyl kıgen atlettiń joldan taıyp ketkenin sýdıalar kórgen. Dáýlet joldan burylyp baryp, jerge otyrǵan. Sýdıa bir qaraǵanda Dáýlet kózden ǵaıyp bolǵan. Sosyn artynan barǵanda onyń jerde jatqanyn kórgen. Uıaly telefondary shashylyp jatty. Sýdıa tez arada jigitterdi ratsııamen shaqyrdy. Sol jerden jedel járdem kelgenshe alǵashqy kómek kórsetildi. Nebári 3 mınýtta jedel járdem keldi. Odan keıin reanımobıl jetti. Osynyń bári - 5 mınýt ishinde bolǵan oqıǵa. Eki jedel járdem brıgadasy Dáýlettiń ómirine arasha tústi. Biraq aman alyp qala almadyq. Ázirge dárigerler Dáýlettiń neden ólgenin aıtpady. Marqumnyń denesi máıithanada jatyr», - dedi Elmıra.
Onyń aıtýynsha, báıgege tirkelgen kezde sportshylar arnaıy medıtsınalyq qaǵazyn alyp keledi.
«Báıgege 18-den asqan adamdar ǵana qatysa alady. Eń aldymen olar saıtqa tirkeledi. Start paketterin alar kezde densaýlyǵy jaqsy ekenin dáleldeıtin anyqtama ákeledi. Olar qandaı sport túrine kelgenin túsinýi kerek qoı. Sportqa baılanysty barlyq yqtımal saldardy qatysýshy óz moınyna alady. Bul ekstremaldy sport bolǵandyqtan, munda adam densaýlyǵyna zaqym kelýi múmkin. Qatysatyn adamnyń kóptigi sonsha, tirkeýde dárigerdi otyrǵyzyp tekserý múmkin emes. Biz sodan soń qoldaryna qolhat beremiz, onda «medıtsınalyq tekserýden ótken» degen tarmaq bar. 25-35 jastaǵylar - óz-ózine esep bere alatyn adamdar. Ol qaıda kelgenin túsinýi tıis. Uıymdastyrýshylarǵa ótirik anyqtama ákelip, aldaýdan eshkimniń eshteńesi ketpeıdi», - dedi Elmıra.
Adrenaline Nomad Race jarysynda atletter eki kategorııada júgiredi. Open kateogorııasynda sportqa jańadan qadam basyp jatqan áýesqoılar baq synasa, Elıt kategorııasynda tisqaqqan kásibı sportshylar júgiredi.
«Dáýlet birinshi ret qatysqan. Olar komandasymen Elıt kategorııasynyń paketin aldy. Alaıda, men tirkegen kezde birinshi ret qatysyp jatqan adamdar Openge júgirgeni durys ekenin aıttym. «Joq, biz Elıtte júgiremiz» dedi ol», - dep naqtylady uıymdastyrýshy.
Onyń aıtýynsha, bul jarysta adam ólimi birinshi ret tirkelip otyr. Endi uıymdastyrýshylar sportshylardy tirkeý kezinde ózderi olardyń densaýlyǵyn tekserýge múddeli.
Qazir qaıtys bolǵan atlettiń otbasyna Adrenaline Nomad Race komandasy qarjylaı kómek kórsetip jatyr. Sonymen qatar, olar jerleý rásimine de kómektespekshi.
