Almatyda jarylǵan jylý qubyry qalpyna keldi
«Sháripov pen Gogol kósheleriniń qıylysynyń soltústiginde bolǵan jylý trassasyndaǵy apattyń saldary joıyldy. 11 qarashaǵa qaraǵan túni saǵat 01:50-de «Almaty jylý jelileri» JShS brıgadasy dıametri 400 mm qubyrdy jóndep bitti. Synaq júrgizilgennen keıin jylý magıstrali paıdalanýǵa berildi jáne túngi saǵat 2:40-ta jylý birqalypty berile bastady ári belgilengen rejımde jumys istep tur. Sondaı-aq kólik qozǵalysyna da ruqsat»,- dep habarlady Almaty qalasynyń energetıka jáne sýmen jabdyqtaý basqarmasy
Basqarma málimetinshe, asfalt jabyndysyn aýa raıy qolaıly bolǵan jaǵdaıda osy jyldyń 13 qarashasyna deıin jóndeý josparlanyp otyr.
«Kenetten tótenshe jaǵdaı týyndasa (sý, bý shyǵaryndylary) «AlTS» JShS dıspetcherine +7-727-378-06-65 telefonyna habarlasý qajet. Óz betińizshe áreket etpeńiz jáne birden habar berińiz»,- dep eskertedi vedomstvodan.
Eske salaıyq, keshe Almaly aýdanynda Gogol kóshesinen tómen Sháripov kóshesiniń boıynda qubyr jarylǵan edi.
Kommýnaldyq apat saldarynan 67 kóppáterli jáne 2 jeke úı, 6 bilim nysany jáne 20-dan astam basqa nysandar ýaqytsha jylýsyz qalǵan bolatyn.
Sońǵy jyldary bul aýmaqta qubyrdyń tozýyna baılanysty 17 apat bolǵan, búgingisi - 18-shi oqıǵa.
