Almatyda jaryq nege jıi sónip qalady

ALMATY. QazAqparat- Almaly aýdannyń negizgi problemalarynyń biri – elektrmen qamtamasyz etýdiń turaqsyzdyǵy. Jyl basynan beri elektr jelilerinde 240-tan astam avarııa boldy. Bul týraly aýdan turǵyndarymen kezdesý barysynda Erbolat Dosaev málim etti, dep habarlaıdy QazAqparat tilshisi.

Shahar basshysynyń sózinshe, aýdanda eski jáne tozǵan jelilerdiń saldarynan elektr kózderi isten shyǵyp, jıi avarııalar oryn alady, ásirese Baıtursynov – Abaı – Tóle bı – Rozybakıev kósheleriniń boıynda. Bıyl elektr jelilerinde 240-tan astam apat boldy.

«Elektr energııasymen jabdyqtaýdyń senimdiligin arttyrý úshin 2022-2023 jyldary qalanyń elektr jelilerin jańartý kózdelgen.Osy joba aıasynda aýdan boıynsha eki jyl ishinde rezervtik qýatty 10kVt-qa deıin ulǵaıtyp, 156 km eskirgen kabelderdi aýystyrý, sondaı-aq 13 taratý jáne 195 transformatorlyq podstantsııany qaıta jańartýdy qarastyryp otyrmyz»,- dedi ol.

Qazirdiń ózinde 55 shaqyrym kabel jelileri aýystyryldy, 8 taratý jáne transformatorlyq stantsııa jańartyldy.

«Jyl sońyna deıin taǵy 26 km jelini aýystyryp, 2 taratý jáne 8 transformatorlyq podstantsııany qaıta jańǵyrtamyz. Nátıjesinde, 2022 jyldyń sońynda aýdandaǵy tozǵan elektr jelileriniń úlesi 70-ten 56%-ke deıin azaıady. Joba aıaqtalǵannan keıin kelesi jyly taǵy 75 km jelini jańartý, 3 taratý jáne 145 transformatorlyq podstantsııany qaıta jańartý esebinen tozǵan jelilerdiń úlesi 44%-ke deıin tómendeıdi»,- deıdi Erbolat Dosaev.

Aıtýynsha, osy sharalardyń barlyǵy Almaly aýdanyndaǵy elektr jelileriniń jumysyn turaqtandyrýǵa múmkindik beredi.

«10 qyrkúıekke deıin eki ýchaskede 415 metr jylý jelilerin qaıta jańartýdy aıaqtaımyz, onyń ishinde: Dosmuhamedov kóshesiniń boıymen Qurmanǵazydan Abaıǵa deıin uzyndyǵy 225 metr jáne Bógenbaı batyr – Radostovets qıylysyndaǵy aýlada – 190 metr»,- dep qosty qala basshysy.