Almatyda jarty jyl ishinde 50 myńnan astam kontrafaktilik aýdıo jáne beıne ónimderi tárkilendi - Ádilet departamentiniń bas mamany
Y. Maýsymnyń 25-i. QazAqparat /Erlik Erjanuly/ - Búgin Almatyda 38 332 kontrafaktilik aýdıo jáne beıne ónimderin joıý sharasy ótti.
«Ádilet departamentiniń ıntellektýaldyq menshik quqyqtary bólimi «Nur Otan» HDP qalalyq fılıalynyń ókilderimen birlesip mamyrdyń 14-i men maýsymnyń 2-si aralyǵynda saýda oryndary men jaıma bazarlarda reıd júrgizdi. Bizdiń bul josparly is-sharamyz kezinde 38 332 kontrafaktilik beıne jáne aýdıo ónimderi tárkilendi. Olardyń jalpy quny 11 mıllıon 893 myń 800 teńgeni quraıdy», deıdi Ádilet departamentiniń jetekshi mamany Baýyrjan Buıraev. Onyń aıtýynsha, buǵan deıin sáýir aıynda ótken reıd kezinde olar 15 myńdaı zańsyz aýdıo jáne beıne ónimder tárkilegen. Bul joly olardyń sany 2 eseden asyp otyr. Departament qyzmetkerleri «Nur Otan» HDP ókilderiniń qatysýmen jyl basynan beri 75 tekserý ótkizgen. Onda 43 quqyq buzýshylyqty anyqtalyp, sotqa 30 ákimshilik ister jiberilip, sot sheshimimen zań buzýshylarǵa 1 mıllıon 80 myń 945 teńge aıyppul salyndy.
«Byltyr 100 myń kontrafaktilik ónim tárkilengen bolatyn. Tekserý sharalaryn josparly keste jáne turǵyndardyń shaǵymdary boıynsha júrgizemiz. Beıne jáne aýdıo ónimderin óndirýshilerdiń ishinde «Melomannan» basqalary kontrakfaktilik ónimderdi anyqtaýda asa belsendi emes. Jalpy tárkilengen ónimder arasynda otandyq óndirýshilerdiń zańsyz kóshirilgen aýdıo jáne beıne taspalarynyń úlesi az», deıdi Ádilet departamentiniń ıntellektýaldyq menshik quqyǵyn qorǵaý bóliminiń bas mamany Asqar Táýkebaev.
