Almatyda jarty jyl ishinde 2 myńnan astam adamnan qaterli isik anyqtaldy
ALMATY. QazAqparat - Almatyda bıylǵy jyldyń 6 aıynda 2363 adamnan qaterli isik anyqtalyp, dıspanserlik esepke alynǵan. Bul týraly óńirlik kommýnıkatsııalar qyzmeti alańynda Almaty onkologııalyq ortalyǵynyń klınıka-dıagnostıka bóliminiń meńgerýshisi Náılıa Aqjolova aıtyp berdi, dep habarlaıdy QazAqparat tilshisi.
Onkologııalyq syrqat kóp jaǵdaıda biraz ýaqytqa deıin eshqandaı belgi bermeıdi, onyń qaýiptiligi de osynda. Ádette aýrý sımptomdary úshinshi nemese tórtinshi satyda ǵana biline bastaıdy.
«Eń aldymen der kezinde jasalǵan dıagnostıka obyrdy bastapqy satyda anyqtap, naýqasty emdep jazýǵa múmkindik beredi. Bastapqy satysynda qaterli isikten qulan-taza aıyǵyp ketýge bolady. Al úshinshi, tórtinshi satyda em-domnyń aýyr túrleri, hımıoterapııa, radıkaldy operatsııalar qoldanylady. Іsikpen kishigirim kezinde, paıda bolǵan kezinde kúresken jeńil, úlkeıip ketkende ol adam ómirine qaýip tóndiredi», - dedi dáriger.
Dárigerdiń aıtýynsha, qala turǵyndary arasynda eń kóp sút bezi obyry, ekinshi – kolorektaldy obyr, úshinshi – ókpe obyry, tórtinshi orynda – asqazan obyry kezdesedi.
Sondyqtan qaterli isiktiń aldyn alý maqsatynda josparly skrınıngterden ýaqtyly ótip turý qajet.
«Tıimdiligi dáleldengen skrınıng túrleri: 40 pen 70 jas aralyǵyndaǵy áıelderdi sút bezi obyryna mamografııalyq skrınıngten ótkizý – 2 jylda 1 ret; 30 ben 70 jas aralyǵyndaǵy áıelderdi jatyr moıny obyryna tsıtologııalyq skrınıngten ótkizý – 4 jylda 1 ret; 50 men 70 jas aralaǵynda qan arqyly, kolonoskopııa ádisimen toq ishek, tik ishek obyryna tekserý – 2 jylda 1 ret ótý qajet», - dedi Náılıa Aqjolova.
Ol sondaı-aq qaterli isik uzaq ýaqyt boıy qalyptasyp jetiletinin, sol sebepti erte anyqtalǵan jaǵdaıda aýrýdyń asqynýyna jol bermeı, ýaqtyly em-dom jasaýǵa múmkindik bar ekenin atap ótti.
Aıta keteıik, qala turǵyndary skrınıngten tirkelgen emhana arqyly ótedi. Skrınıngke ýchaskelik medbıke shaqyrýy tıis. Josparly tekserýden ótetin jasqa jetken azamattar emhanaǵa ózderi habarlassa da bolady. Sonymen qatar, «Halyq densaýlyǵy jáne densaýlyq saqtaý júıesi týraly» kodekstiń 87-babyna sáıkes, jumys berýshiler skrınıgten ótetin jumyskerlerdi bir kúnge jumystan bosatýǵa mindetti.
