Almatyda jaramsyz qaǵazdardy qabyldaıtyn beket ashyldy
ALMATY. 31 mamyr. QazAqparat - Búgin Almatyda «Qazaqstan qaǵazy» AQ qala turǵyndarynan jaramsyz qaǵazdardy qabyldaıtyn birinshi beketin ashty.
Ol Tımırıazev pen Áýezov kósheleriniń qıylysyndaǵy «Atakent» iskerlik kórme ortalyǵy aımaǵynda ornalasqan. Bul Almaty qalasy ákimdiginiń qoldaýymen júzege asyrylatyn ilki joba sheńberinde «Qazaqstan qaǵazy» kompanııalar toby ashatyn bes bekettiń alǵashqysy bolyp tabylady.
«Birinshi kezekte, Almaty qalasy ákimdiginiń bizdiń bastamaǵa jan-jaqty qoldaý kórsetkeni úshin alǵysymyzdy bildirgimiz keledi. Olardyń qoldaýynsyz osy jobany iske asyrý múmkin bolmas edi. Aldaǵy ýaqytta búkil qala aýmaǵynda jaramsyz qaǵazdardy qabyldaıtyn osyndaı beketterdiń jelisi jasalady. Sondaı-aq keleshekte elimizdiń barlyq iri qalalary men eldi mekenderinde osyndaı beketterdi ashý josparlanyp otyr», - deıdi toptyń bas dırektory Taısııa Kogýtıýk. Onyń aıtýynsha, bul bekettiń ashylýy jaqyn aımaqta ornalasqan úılerdiń turǵyndary jáne kásiporyndar men keńseler qyzmetkerlerine aqyly negizde ózderine qajetsiz jaramsyz qaǵazdardy tapsyrýǵa múmkindik beredi. Sonymen qatar bosqa rásýa bolyp júrgen qaldyqtardyń kólemin azaıtyp, qorshaǵan ortany jaqsartýǵa áser etedi.
