Almatyda jaraqattanǵan naýqastarǵa arnaıy bilezik taǵylatyn bolady
ALMATY. QazAqparat - Almaty qalalyq shuǵyl kómek kórsetý aýrýhanasynda endi naýqastardyń ahýalyn kórsetetin arnaıy bilezik taǵylatyn boldy. Bul týraly atalǵan aýrýhananyń qabyldaý bóliminiń meńgerýshisi ErmekJeldibaev aıtty, dep habarlaıdy QazAqparat tilshisi.
Aýrýhanada arnaıy bilezikterdi qoldanatyn shuǵyl kómek kórsetýdiń úsh deńgeıli «3H júıesi» engizilip otyr.
«Qabyldaý bólimine naýqas kelip túskennen soń, arnaıy tálim alǵan medbıke ol týraly aqparattardy jınaqtap, tekserý bólmesine jiberedi. Naýqasqa onyń málimetteri men shtrıh kod kórsetilgen arnaıy bilezik taǵylady. Bul dárigerge naýqas týraly málimetter bazasynan aqparattar alýǵa kómektesedi. Bileziktiń túsi syrqattyń jaǵdaıyna qaraı ártúrli bolady. Qyzyl - óte aýyr, sary- jaǵdaıy ortasha, jasyl - jaraqaty jeńil degendi bildiredi», - dedi Ermek Jeldibaev.
Osydan keıin naýqas «Emergency room» dep atalatyn arnaıy aımaqqa barady. Onda taǵy da úsh tústi palatalar bolady. Shaǵyn bólmede naýqasty birden birneshe maman emdeıdi.
«Buryn naýqastardy tekserýge jeke-jeke bólmelerge jiberetinbiz. Adam onda kezek kútip qalatyn. Bul júıeniń ereksheligi de osynda, qajetti dárigerlerdiń barlyǵy tekserý aımaǵynan tabylady. Máselen, jaraqaty jeńilderi «jasyl» tústi bólmege barsa, «sary» tústi bileziktegi syrqat statsıonarlyq em qabyldaýǵa joldanady. Óte aýyr halde kelgen naýqastar birden «qyzyl» tústi belgidegi bólmege jiberiledi», - dedi ol.
Atalǵan aýrýhanada kún saıyn 150-180 naýqas qabyldanady. Dárigerlerdiń aıtýynsha, olardyń jartysy jol apaty, turmystaǵy janjal kesirinen ár túrli deńgeıde jaraqattanǵandar. Aýrýhanaǵa 2017 jyly barlyǵy 55 myń adam kelgen. Olardyń ishinde 17 myńy jaraqattaryna baılanysty aýrýhanaǵa jatqyzylǵan.
