Almatyda japsarlas qurylystardyń kópshiligi ruqsatsyz salynǵan - Almaty TJD
ALMATY. QazAqparat - Búgin Almaty qalalyq Tótenshe jaǵdaılar jónindegi departamentinde órt qaýpi bar kezeńniń, sýǵa shomylý maýsymynyń bastalýy jáne kiriktire nemese japsarlas salynǵan nysandar máselesi boıynsha brıfıng bolyp ótti.
Onda sońǵy kezde qalada bolǵan iri órt oqıǵalaryna qatysty jasalǵan saraptama qorytyndysy jarııa etildi.
«Almatyda saýda oıyn-saýyq keshenderinde jáne japsarlas qurylystarda bolǵan órt oqıǵalaryna saraptama jasaldy. Sonyń nátıjesinde bul nysandardyń kóbisi joba-smetalyq qujattamasyz jáne basqa da ruqsat qujattarynsyz salynǵany belgili boldy. Janǵysh qurylymdar órttiń tez taraýyna múmkindik beredi. Onyń ústine, bul mekemelerdiń kúzetshileri órtti aldymen 20-30 mınýt boıy ózderi sóndirýge tyrysqan. Órt kúshine ábden minip, úlken aýmaqqa taralǵanda baryp, órt sóndirýshilerdi shaqyrǵan nemese tipti olardy kezdeısoq kórip qalǵandar shaqyryp otyrǵan. Mine osy sebepten tilsiz jaýdy joıý úshin jeke quram músheleri men arnaıy tehnıkalardy kóptep jumyldyrýǵa týra keledi. Eger de kúzetshiler órt sóndirý qyzmetin der kezinde shaqyrǵanda órt munshalyqty úlken aýmaqqa tarap, zalal keltirmes edi», - dedi Almaty qalalyq TJD tehnıkalyq mólsherleý bastyǵy, azamattyq qorǵanys podpolkovnıgi Rodrıgo Rozenbergs.
Aıta ketelik, qazir Almatyda turǵyn úılerge japsarlas salynǵan úı-jaılarǵa tekserý júrgizilip, esepke alynyp jatyr.
Ázirge arnaıy komıssııa qalada 146 iri japsarlas qurylymdardyń bar ekendigin anyqtady. Olardyń qanshasy zańsyz salynǵany ázirge naqtylaný ústinde. Qalaı bolǵanda zańsyz salynǵan qurylymdar súrilip tastalatyn bolady.
