Almatyda jappaı tártipsizdik kezinde zardap shekken kásipkerlerdiń shyǵyny qalaı ótelip jatyr

ALMATY. QazAqparat- Óńirlik komıssııa Almatydaǵy zardap shekken bıznes sýbektilerinen kelip túsken barlyq ótinishti qarady. Bul týraly brıfıng barysynda qalalyq kásipkerlik jáne ınvestıtsııalar basqarmasynyń basshysy Erkebulan Orazalın aıtty, dep habarlaıdy QazAqparat tilshisi.

Spıkerdiń sózinshe, shaǵyn jáne orta bızneske keltirilgen zalaldy óteý jónindegi óńirlik komıssııa ótinishterdi qysqa merzimde qarap, memlekettik qoldaý kórsetip, qala ekonomıkasyn qalpyna keltirýdi jedeldetti.

Erkebulan Orazalın atap ótkendeı, Info Kazakhstan elektrondy platformasyna 1188 kásipkerden 1355 ótinim kelip tústi.

Qalǵan 216 ótinish pysyqtaý úshin joldandy (120 ótinish boıynsha qujattardyń tolyq toptamasy usynylmady, 96 ótinish jeńildetilgen mehanızm sheńberinde ótem somasymen kelispeýine baılanysty, sot saraptamasyna joldandy).

«Óńirlik komıssııa májilisiniń qorytyndysy boıynsha 5 286,5 mln. teńge somasyndaǵy 1139 ótinish, onyń ishinde, 4 194,6 mln. teńge somasyndaǵy 595 ótinish bıýdjet qarajattarynan, 1 091,9 mln. teńge somasyndaǵy 544 ótinish «Jańa Alataý» qorynyń qarajattarynan maquldandy»,- deıdi ol.

Erkebulan Orazalın Kásipkerler palatasy zardap shekken sýbektiler, olardyń sany, keltirilgen shyǵyn kólemi týraly málimetterdi mezgil-mezgil naqtylap, jańartyp otyratynyn eske saldy.

«Negizinen saýda jáne qyzmet kórsetý sektory zardap shekti. Ótinimderdiń kópshiligi azyq-túliktik emes taýarlardy, aıaq kıimderdi, kıimderdi satýmen aınalysatyn kásipkerlerden, sondaı-aq turmystyq tehnıkany, zergerlik buıymdardy satatyn saýda-oıyn-saýyq ortalyǵynyń aýmaǵynda ornalasqan aıyrbastaý pýnktteri men dúkenderdiń ıelerinen kelip tústi», - dedi Erkebulan Orazalın.

Zardap shekken bıznesti tolyq qamtý jáne qala ekonomıkasyn tezirek qalpyna keltirý maqsatynda Komıssııa hatshylyǵy qujattardyń tolyq paketin usyný boıynsha kómek kórsetý úshin Qoldaý kásipkerlik ortalyǵynyń janynan konsýltatsııalyq shtab ashty.

Ótemaqy áli tólenbegen zardap shekken kásipkerler jumys kúnderi 9.00-den 18.00-ge deıin myna mekenjaı boıynsha: Almaty qalasy, Baızaqov kóshesi, 303, 101 kabınetke keńes alý úshin júgine alady.

Óńirlik komıssııanyń kelesi otyrystary 2022 jylǵy 12, 15 jáne 18 naýryzǵa josparlanǵan.

Brıfıngke Almaty qalasy Kásipkerler palatasynyń dırektory Aıtýar Qoshmambetov qatysyp, zardap shekken bıznesti qoldaý úshin «Kúsh – birlikte» qory qurylǵanyn aıtty.

Komıssııa sheshiminen keıin Qor qarajaty obektileri tonalǵan jáne buzylǵan Almatydan jáne basqa óńirlerden kelgen kásipkerlerge bólinedi.