Almatyda jappaı ereýil kezinde 28 avtobýsqa zaqym kelgen

ALMATY. QazAqparat - Almatyda bgúkil avtobýs, trolleıbýs baǵyttary jumys istep tur, barlyq baǵdarshamdar qalpyna keltirildi. Bul týraly Qalalyq mobıldilik basqarmasynyń basshysy Ǵanı Myrzahanov aıtty, dep habarlaıdy QazAqparat tilshisi.

«Búginde barlyq 151 baǵyt jáne 1600 birlik jyljymaly quram, onyń ishinde trolleıbýs jáne qala mańyndaǵy baǵyttar iske qosyldy. Qalalyq marshrýttardyń jumys tártibi 8.00-den 21.00-ge deıin, qala mańyndaǵy marshrýttarda 9.00-den 21.00-ge deıin. Sonymen qatar, metro jumysy qaıta jandandy. Jumys ýaqyty - 7.00-den 21.00-ge deıin»,- dedi spıker.

Ǵanı Myrzahanovtyń aıtýynsha, tártipsizdik kezinde 28 avtobýs zaqymdalǵan.

Onyń 16-sy tolyq qalpyna keltirildi, qalǵan 12 avtobýs qańtar aıynyń sońyna deıin qalypty jumys rejımine kóshedi.

Sondaı-aq, áýejaı men temirjol vokzaldary shtattyq rejımde jumys istep tur.

15 qańtardan bastap qalaaralyq tasymaldar jartylaı jańartyldy (Taldyqorǵan, Taraz, Shymkent qalalary).