Almatyda Japonııadan ózge elde balamasy joq kásiporyn ashylmaq
ALMATY. QazAqparat - Almatynyń Alataý aýdanyndaǵy Indýstrıaldy aımaqta jańa qurylystyń irgetasyn qalaý jumystary bastaldy. Endi onda japonııalyq «Tokyo Rope Manufacturing» transulttyq korporatsııasy ınjenerlik júıelerdi qorǵaıtyn ekinshi joǵary tehnologııalyq zaýyt salady, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Metaldan jasalǵan asa tózimdi temir torlar men panelder shyǵaratyn «Tokyo Rope Almaty» atty alǵashqy zaýyt ótken jyldyń qarasha aıynda Qazaqstan Respýblıkasynyń Prezıdenti Nursultan Nazarbaevtyń qatysýymen ashylǵan edi. Qala basshysy Baýyrjan Baıbek búgingi kúni Almatynyń ınnovatsııa tartýǵa yńǵaıly qalaǵa aınalǵanyn jetkizdi. Oǵan dálel retinde qala boıynsha ústimizdegi jyly negizgi kapıtal ınvestıtsııasynyń 11%-ǵa, syrtqy ınvestıtsııanyń 25%-ǵa artqanyn aıtty.
«Ótken jyldyń qarasha aıynda bizdiń Memleket basshysy men Japonııa Premer-Mınıstri Sındzo Abeniń kezdesýi barysynda taraptar ekijaqty yntymaqtastyqty kúsheıtý týraly ýaǵdalasqan bolatyn. Osyǵan oraı, Almatyda japondyq iskerlik klýby men japondyq ındýstrıaldy park ashylyp, «Tokyo Rope Almaty» jobasynyń ekinshi kezeńi júzege asa bastady. Jalpy, Almatynyń Indýstrıaldy aımaǵynda ımportty almastyratyn, eksporttyq ónimdi ulǵaıtatyn 40 joba qazirdiń ózinde qolǵa alyndy», - dedi B.Baıbek.
«Tokyo Rope Manufacturing» dırektorlar keńesiniń tóraǵasy Shıgeto Tanakı bul Japonııadan ózge elde balamasy joq erekshe kásiporyn ekenin jetkizdi. Indýstrıaldy aımaqtaǵy 4 gektar jerge ornalasatyn zaýytty iske qosý úshin sheteldik kompanııa jumsaıtyn ınvestıtsııa kólemi 3,6 mlrd teńgeni quraıdy.
«Munda joǵary sapaly metall trostar, taýly jáne karerli jumystar úshin bolattan jasalyp, qorǵasynmen qaptalǵan torlar, býrosvaılyq ankeralar jáne basqa da ónimder shyǵarylady. Ónimderde qazaqstandyq mazmunnyń úlesi bolǵandyqtan ózindik quny da birshama arzan. Óndiris kólemi boıynsha jylyna 17 myń tonna ónim shyǵarylady. Zaýytty iske qosý 2018 jylǵa josparlanǵan», - dedi Sh. Tanaka.
«Tokyo Rope» kompanııasynyń negizi osydan 130 jyl buryn qalanǵan, bolat arqandar shyǵarý boıynsha álemde jetekshi ról atqarady, sonymen qatar selge, daýylǵa, túrli tas kóshkinderine qarsy túratyn nysandardy salýdy jobalaýmen, montajdaýmen de aınalysady. Búgingi kúni álemdegi iri 20 kópirdiń 12-si (Bosfor buǵazynyń,Sýets kanalynyń boıyndaǵy, Gonkongtegi álemdegi eń uzyn Stoýnkaters kópirleri) japondyq metall arqandaryn paıdalanyp salynǵan. Japonııada shyǵatyn árbir tórtinshi avtokólikte «Tokyo Rope» ónimderi bar. Kompanııa jedel lıfterge jáne ınjenerlik qorǵanysqa qajet joǵary sapaly ónimder shyǵarýmen de tanymal.
