Almatyda japondyq kompanııa kópdeńgeılik parkıngter jasaý boıynsha jobany júzege asyrmaq nıette
ALMATY. QazAqparat - Almaty qalasy ákimdiginiń delegatsııasy joǵary deńgeıde damyǵan qoǵamdyq kólik júıesin, jol qozǵalysyn basqarý jáne tótenshe jaǵdaılardyń aldyn alý júıesin zerttep, ıgerý maqsatynda Tokıo qalasyna bardy. Bul týraly búgin Almaty qalasynyń Investorlarǵa qyzmet kórsetý ortalyǵy málim etti.
Іs-sapar barysynda qazaqstandyq delegatsııa Tokıo qalasynyń polıtsııa departamentiniń Jol qozǵalysyn basqarý ortalyǵynda boldy. Ondaǵy maqsat - ózara tájirıbe almasý jáne Almaty qalasynda da osyndaı ortalyq qurý.
Odan basqa, taraptar qoǵamdyq kólik salasyndaǵy yntymaqtastyqty nyǵaıtý múmkindikterin talqylady.
Aıta ketelik, Almaty ákimdiginiń delegatsııasy japondyq bıznes-qaýymdastyqtyqqa ózderiniń basymdyqqa ıe ınvestıtsııalyq jobalaryn tanystyrdy. Solardyń ishinde Almatyda jeńilrelstik kólik júıesi jaıly áńgimeledi.
Odan basqa, qazaqstandyq tarap bızneske memlekettik qoldaý kórsetý júıesine jáne sheteldik ınvestorlarǵa beriletin jeńildikterge jan-jaqty toqtaldy.
Kezdesý barysynda iri japondyq kompanııalar bul jobalarǵa qyzyǵýshylyǵyn bildirip, uzaq merzimdi yntymaqtastyqqa daıyn ekendikterin aıtty.
Mysaly, NH Parking System Co.LTD kompanııasy Almaty qalasynda avtomattandyrylǵan kópdeńgeıli parkıng jasaý birlesken jobasyn usyndy. Bul jobany júzege asyrý qoǵamdyq oryndar men turǵyn úıler mańyna avtokólik qoıý máselesin sheshýge septigin tıgizedi.
Odan basqa, japondyq «Tokio Rope» kompanııasy Almatyda temir tor óndirisi jelisin qolǵa almaq nıette.
«Tokio Rope» - seısmıkalyq qurylymdardy nyǵaıtýǵa arnalǵan metall torlardy óndiretin álemdegi kóshbasshy kompanııa.
Ol sonymen qatar, joǵary tehnologııalyq bolat arqandar, kópirlerge arnalǵan temir arqandar jáne kún energetıkasy úshin symdar jasaıdy.
