Almatyda japon mádenıetiniń festıvali ótti (FOTO)
ALMATY. QazAqparat- Búgin Almatyda QR Ortalyq memlekettik mýzeıinde Japonııa eliniń mádenıeti festıvali ótti. Onda almatylyqtar kúnshyǵys eliniń óneri jáne salt-dástúrlerimen jaqyn tanysty.
Osy oraıda mýzeı qabyrǵasynda dástúrli túrde japon eliniń mańyzdy tarıhı kezeńderi, kıim úlgisi, qolóner buıymdary jaıynda jekelegen kórmeler uıymdastyryldy.
«Japonııa mádenıetiniń festıvali Qazaqstanda osymen 10-shy ret ótkizilip otyr. Ol dástúrli túrde osy naýryz aıynda uıymdastyrylady. Sharanyń basty maqsaty - qala turǵyndary men qonaqtaryn kúnshyǵys eliniń mádenıeti, salt-dástúri jáne ádet-ǵuryptarymen jaqyn tanystyrý», - dedi Qazaqstan-Japonııa ortalyǵynyń dırektory Janar Orazǵalıeva.
Festıvalge kelýshiler aldymen japon dabylshylarynyń taıko dep atalatyn ulttyq aspaptaǵy ónerin, sondaı-aq, kendo - semserlesý sheberleriniń ónerin tamashalady.
«Festıval aıasynda osy mýzeıde sándik-qoldanbaly óner, orıgamı, matalardy boıaýǵa jáne órnekteýge arnalǵan qaǵaz trafaret, ıeroglıf jazý, japondardyń ulttyq taǵamdaryn jáne shaı ázirleý rásimi boıynshga sheberlik synyptary bolady», - dedi J. Orazǵalıeva.
Aıta ketelik, atalmysh is-shara Japonııanyń Qazaqstandaǵy elshiliginiń qoldaýymen ótkizildi. 
