Almatyda janýarlardyń óliminen soń zoobaq qyzmetkerleri jumystan qýyldy
ALMATY. QazAqparat – Almaty zoobaǵynda sońǵy 2 aıda 6 janýar qyrylyp qalǵandyqtan qyzmettik tekserý júrgizildi, dep habarlaıdy QazAqparat tilshisi.
Veterınarlyq komıssııa Almaty zoobaǵynyń buıryǵymen arystan abdandary Gera, Asol, kerikter Gratsııa men Almanyń, bulan Rokkı men jolbarystyń urǵashysy Radanyń neden ólgenin anyqtady.
«Gera men Assol zoobaqqa qoldan alyndy. Olar panleıkopenııa - mysyqtuqymdastardyń obasy dertinen kóz jumdy. Gratsııa qos búıreginiń ınfarktinen kóz jumdy. Munyń aldynda qoıylǵan «tromb úzilgen» degen dıagnoz rastalmady. 7 jasar Rokkı ózi kelgende álsiz bolatyn. Ol parazıtterge qarsy profılaktıkalyq sharalardan soń tura almady. Qyrylǵan janýarlardyń barlyǵynyń ımmýnıtetinde álsizdik bolǵan. Komıssııanyń qorytyndysy boıynsha janýarlar bireýdiń qastandyǵynan nemese veterınarlardyń biliktiliginiń tómendiginen ólgen dep kesip aıtý qıyn», – dedi komıssııa tóraǵasy, BUU damý baǵdarlamasynyń bıoalýandyq boıynsha sarapshysy, zoolog Konstantın Plahov.
Mamannyń aıtýynsha, zoobaqtyń veterınarlyq qyzmetinde birqatar zańbuzýshylyq bolǵan.
«Birinshiden, barlyq janýar qoldan alynǵan. Densaýlyǵynda, ımmýnıtetinde kinárat bolǵan. Veterınarlar olardy qabyldap alǵan kúni-aq densaýlyǵyn tekserip, klınıkalyq tekserý júrgizbegen. Materıaldardy dıagnostıkaǵa jibermegen. Mal dárigerleri janýarlardyń alǵashqy sımptomynan keıin birden tekserýge almaǵan. Mysaly, Assoldi emdegende taldaý nátıjeleri qaperge alynbaǵan. Oǵan fýrosemıd preparaty salynǵan. Bul oǵan keri áserin tıgizdi. Dárilerdiń dozalanýy janýarlardyń salmaǵyna sáıkes berilmegen. Emdeý de únemi dıagnozǵa saı júrgizilmegen. Komıssııa qorytyndysy boıynsha veterınarlyq bólim basshysynyń mindetin atqarýshy Azamat Dúısenovtiń, dırektordyń zooveterınarlyq bólim boıynsha orynbasary Aıbol Kúderınniń óz qyzmetine saı áreket etpegeni anyqtaldy. Bul qyzmetkerlerdi ákimshilik jazaǵa tartý usynyldy», - dedi Konstantın Plahov.
Óz kezeginde zoobaq basshysy Vıacheslav Banşıkov Aıbol Kúderınniń jumystan ketkenin habarlady. Al Azamat Dúısenov qyzmetinen shettetildi.
«Kúzet agenttiniń bir qyzmetkeri, sektsııanyń bir qyzmetkeri jumystan qýyldy. Bizge jaqsy mamandar kerek. 5 adamnyń qyzmeti tómendetildi. Keıbireýler qyzmetinen ketti», - dedi Vıacheslav Banşıkov.
«Urǵashy jolbarys Rada tym qartaıyp qalǵandyqtan, evtanazııa jasaldy. Al keriktiń tóli Alma juqpadan óldi. Bul aýrýdan ázirge Qazaqstanda emi joq. Infektsııa syrttan ákelingen jemshópten juǵýy múmkin», - dedi komıssııa qorytyndysy.
