Almatyda jańǵyrtylǵan HQKO ashyldy

ALMATY. QazAqparat- Jańǵyrtylǵan halyqqa qyzmet kórsetý ortalyǵynda kelýshilerge barynsha jaǵdaı jasalǵan. Balalarǵa arnalǵan burysh, erekshe qajettiligi bar adamdar úshin – pandýs jáne qyzmet kórsetiletin jeke sektor qarastyrylǵan, dep habarlaıdy QazAqparat tilshisi.

Modernızatsııadan ótken halyqqa qyzmet kórsetý ortalyǵyn Almaty ákimi Erbolat Dosaev, QR Tsıfrlyq damý mınıstri Baǵdat Mýsın jáne memlekettik korporatsııanyń basqarma tóraǵasy Súıenish Ábdildın aralap kórdi.

Jańa HQKO-da barlyǵy halyqqa yńǵaıly etip jasalǵan. Klıentter kóptep jınalmaýy úshin HQKO arnaıy bólimderge bólingen. Baılanys aımaǵyna kelýshiler qyzmetti ózderi ala alady. Munda smartfon arqyly qyzmetti qalaı alýǵa bolatynyn úıretedi.

Ári áleýmettik qyzmet kórsetý, qujattaý jáne daıyn qujattardy berý bólimi bar. Balalarǵa arnalǵan burysh, erekshe qajettiligi bar adamdar úshin – pandýs jáne qyzmet kórsetiletin jeke sektor qarastyrylǵan.

Munda ınnovatsııalyq jobalar usynylǵan. Sonyń biri táýlik boıy jumys isteıtin 33 uıashyqty postamat, ol jerden ózińizge yńǵaıly ýaqytta daıyn qujatty ala alasyz. Buǵan qosa, HQKO-da tólqujat pen jeke kýálik alý úshin ótinishti óz betinshe berý qujattaý termınaly bar.

Elimizde 2024 jyldyń sońyna deıin memlekettik korporatsııanyń 115 front keńsesi jańǵyrtylady. Almatyda 13 HQKO men arnaıy HQKO bar.

Jyl basynan beri turǵyndarǵa bir jarym mıllıonǵa jýyq qyzmet kórsetildi. Jańǵyrtylǵan HQKO kúnine 3 myńnan astam adamdy qabyldaı alady.