Almatyda «Jańǵaq tal» fılminiń press-kórsetilimi boldy (FOTO)
ALMATY. QazAqparat - Búgin Almatyda rejısser Erlan Nurmuhambetovtyń «Jańǵaq tal» fılminiń press-kórsetilimi bolyp ótti. Týyndyny QR Mádenıet jáne sport mınıstrliginiń tapsyrysy boıynsha Sh. Aımanov atyndaǵy «Qazaqfılm» AQ-y túsirgen.
Fılmde qarapaıym otbasylar arasyndaǵy qarym-qatynastar baıandalady. Bul týyndy Ońtústik Qazaqstan oblysyndaǵy Leńgir qalasy men onyń tóńireginde túsirilgen. Ondaǵy rólderdi jergilikti teatr akterlary oryndaǵan. Olardyń ishinde «Shanshar» teatrynyń artısteri de bar. Túsirý tobynyń aıtýynsha, bul aımaq bekerge tańdap alynbaǵan. Óıtkeni, Qazaqstanda jańǵaq aǵashtarynyń otany - osy Leńgir aımaǵy eken. Sondaı-aq, osy óńirdiń tabıǵaty da túsirý tobyna qatty unaǵan.
«Men bala kezimde bir adamnyń jańǵaq aǵashyn taıaqpen urǵylap jatqanynyń kýási boldym. Sóıtsem, ol osylaısha grek jańǵaǵyn túsirip jatyr eken. Bul kórinis sanamda jattalyp qaldy. Keıin ol, osy fılmniń negizgi arqaýyna aınaldy», - dedi rejısser Erlan Nurmuhambetov.
Sonymen qatar, ol akterlar quramymen de tanystyrdy.
«Almatydan men tek basty róldi somdaýshy akter - Rústem Janamanovty ǵana aldym. Qalǵandaryn sol jaqta jınadyq. Túsirýge bir aı ýaqyt qalǵanda sol jaqqa baryp, akterlardy tańdaýǵa kiristik. Alaıda, eń basty áıel róline aktrısany tabý qıynnyń qıyny boldy. Balnur Asyldy túsirý jumystary bastalardyń aldynda ǵana taptyq», - dedi rejısser.
Fılmdi túsirýdi rejısser budan 10 jyl aldyn oılastyryp, sodan beri ishteı pysyqtap júrgen eken.
Esterińizge sala ketelik, «Jańǵaq tal» fılmi 2015 jyly qazan aıynda Ońtústik Koreıada ótken 20-shy Pýsan halyqaralyq kınofestıvalinde «Jańa baǵyt» sektsııasynyń bas júldesine ıe bolǵan. Sondaı-aq, XXXI-shi Varshavalyq halyqaralyq kınofestıvalde «Erkin rýh» jańashyl kıno baıqaýyna qatysty.
Budan basqa, «Jańǵaq tal» fılmi bıylǵy jyldyń basynda Frantsııanyń Vezýl qalasynda ótken 22-shi Azııa kınosynyń halyqaralyq kınofestıvaliniń negizgi baıqaýyna qatysyp, birden eki júldeni - Halyqaralyq ádilqazylardyń arnaıy júldesin («Kúrdeli ekonomıkalyq jáne saıası ahýalǵa qaramastan kúldire bilgendigi úshin») jáne Kınosynshylardyń arnaıy júldesin («Aýyl ómiriniń shynaıy jáne batyl beınesi úshin») aldy.
Qazaqstanda fılm úlken prokatqa erteń - 31 naýryzda shyǵarylady.
