Almatyda jańbyrdyń sońy qarǵa ulasty
ALMATY. QazAqparat - Almatyda jańbyrdyń sońy qarǵa ulasty. Bir túnniń ishinde qaladan 1100 tekshe metr qar shyǵaryldy, dep habarlaıdy QazAqparat tilshisi qalanyń «jasyl» ekonomıka basqarmasyna silteme jasap.
Kóktaıǵaqtyń aldyn alý maqsatynda qum shashatyn 155 kóliktiń kezekshiligi uıymdastyryldy. Jaýyn-shashyn túsken ýaqytta 860 arnaıy tehnıka, 2620 adam jumys istedi. Kóktaıǵaqqa qarsy 4262 tonna materıaldar qoldanyldy. Keshki jáne túngi ýaqyttarda tas joldar men trotýarlar qardan tazartyldy.
Tańǵy saǵat 8-degi jaǵdaı boıynsha qalaǵa 15 sm qar túsken, taýly aımaqtarda onyń deńgeıi 25 sm asady. Budan bólek, túngi ýaqyttarda qardy jappaı shyǵarý uıymdastyrylǵan. Bul jumystar tańǵy kólik keptelisinen keıin qaıta jalǵasady.
1100 tekshe metr qar shyǵaryldy. Kúndizgi ýaqytta trotýarlar men aıaldamalardy qardan tazartýǵa kóńil bólinedi, dep atap ótti basqarmada.
