Almatyda jańbyr jaýyp, sońy qarǵa ulasty
ALMATY. QazAqparat - Almaty ákimdigi megapolısti qardan tazartý boıynsha júrgizilip jatqan jumystar týraly aıtty, dep habarlaıdy QazAqparat tilshisi.
Túngi saǵat 03:00 shamasynda Almatynyń tómengi bóliginde jańbyr jaýyp, bir saǵattan keıin onyń arty qarǵa ulasty.
«Joldarǵa, jol qıylystary men jolaıryqtarǵa kóktaıǵaqqa qarsy materıaldar shashyldy. Saǵat 09.00-degi jaǵdaı boıynsha, qala kóshelerine 3073 tonna materıal paıdalanyldy.
Saǵat 05:00-den bastap qar tazalaıtyn kólikterden kolonnalar uıymdastyryldy. Olardyń kedergisiz júrýi úshin jol polıtsııasynyń patrýldik mashınalary kómekke keldi.
Trotýarlardy, jaıaý júrginshiler aımaqtaryn, qoǵamdyq kólik aıaldamalaryn, kólik turaqtaryn tazalaý jumystary júrgizilýde.
Qardy kúreý jumystaryna 597 birlik tehnıka men 1668 jol jumysshysy jumyldyryldy», – delingen ákimdik habarlamasynda.
Qalanyń joǵarǵy bóliginde qar 15 sm-ge deıin, taýly aýdandarda 25 sm-ge deıin tústi.
