Almatyda jańbyr sýynyń saldaryn joıý jumystary jalǵasýda
ALMATY. QazAqparat - 6 sáýir kúni Almaty qalalyq Tótenshe jaǵdaılar departamenti turǵyndardan «112» qyzmetine kelip túsken 400-den astam qońyraý boıynsha jumys jasady, dep habarlaıdy QazAqparat.
«Almatylyqtarǵa 5 sáýir kúni áleýmettik jeliler men SMS arqyly 6-7 sáýirde jańbyr sýynyń tasqyny bolýy múmkindigi týraly eskertildi. Barlyq kommýnaldyq jáne azamattyq qorǵaý qyzmetteri eskertildi jáne joǵary daıyndyq kúıine aýystyryldy. 6 sáýir kúni kúndizgi ýaqytta Almaty qalasynyń Tótenshe jaǵdaılar departamentiniń «112» qyzmeti azamattardan kelip túsken 400-den astam qońyraýdy óńdedi. Barlyq shaqyrýǵa sýdy sorý tehnıkalarymen jáne jumysshylarmen birge Aýdandyq tótenshe jaǵdaılar bólimsheleriniń jáne aýdandyq ákimdikterdiń qyzmetkerleri shyǵyp otyrdy», - delingen TJD aqparatynda.
Qutqarýshylardyń aıtýynsha, sý basý jaǵdaılarynyń basym deni aryq júıeleriniń turmystyq qoqyspen bitelýi nemese sý aǵyzý júıesiniń bolmaýynan oryn alýda.
«Bul rette, taý ózenderine jasalǵan monıtorıng sýdyń deńgeıi men onyń aǵýy boıynsha aıtarlyqtaı aýytqýlar joqtyǵyn kórsetti. Sý basý saldaryn joıý úshin 500-ge jýyq adam, 140-tan astam tehnıka jáne 41 motor sorǵysy jumyldyryldy. Osy ýaqytta 35 ýchaskede sý basý qaýpi seıildi. 24 ýchaskede jumystar jalǵasýda», - delingen baspasóz habarlamasynda.
