Almatyda jańbyr sýy shaıyp ketken bókterdegi joldyń sheti qaıta qalpyna keltiriledi
ALMATY. QazAqparat - Almaty qalasynyń ákimi Baqytjan Saǵyntaev jańbyr sýy shaıyp ketken joldy qalpyna keltirýdi tapsyrdy, dep habarlaıdy QazAqparat tilshisi.
«30 sáýir kúni jaýǵan jańbyr sýy Medeý aýdanyndaǵy Almaly kóshesinde bókterdegi joldyń sheti shaıylyp, topyraǵy tómenge opyrylyp túsken. Oqıǵa ornyna Medeý aýdanynyń tótenshe jaǵdaılar bóliminiń bastyǵy, ákimdik, Qazseldenqorǵaý qyzmetkerleri bardy. Jol jabyndysy, asfaltta uzyndyǵy 12-16 metr jáne eni shamamen 5 sm jaryq paıda bolǵan Kólik pen jaıaý júrginshige shekteý qoıý úshin qaýipti jerler qorshaldy, polıtsııa qyzmetkerleri beket ornatty», - dep habarlady qalalyq TJD.
Almaty qalasynyń ákimi Baqytjan Saǵyntaevtyń tapsyrmasymen jumys toby quryldy. Qazirgi ýaqytta kelgen shyǵyn eseptelýde jáne smeta quny jasalyp jatyr. Osydan keıin jol ýchaskesin jóndeý jáne bókterdi nyǵaıtý jumysy júrgiziledi.
«Qaýipti aımaqtyń uzyndyǵy shamamen 100 metr. Jaqyn mańda turǵyn úıler men kommýnaldyq ǵımarattar ornalasqan. Jaýyn-shashyn kóp jaýǵan jaǵdaıda, tas jol boıynda topyraqtyń odan ári opyrylyp ketý qaýpi bar», - dep habarlady ákimdiktiń baspasóz qyzmeti.
