Almatyda jańbyr quıyp tur: Sý basýdyń aldyn alý úshin 2 myń qap qum daıyndaldy
ALMATY. QazAqparat- Almatyda tańǵa jýyq kún kúrkirep, nóser jaýyn jaýdy, dep habarlaıdy QazAqparat tilshisi.
Qalada búgin saǵat 04:30-dan bastap jańbyr jaýa bastady. Sý basýdyń aldyn alý jáne ony boldyrmaý maqsatynda túnde merdigerlik uıymdardyń kezekshiligi uıymdastyryldy.
«Sýdy kedergisiz ótkizý jáne soryp shyǵarýdy qamtamasyz etý boıynsha jumystardy uıymdastyrý úshin jalpy sany 650 adamnan turatyn mobıldi brıgadalar, 266 arnaıy tehnıka jáne 24 motopompa jumyldyryldy. 2000 qap qum daıyndaldy»,- dep habarlady qalalyq ákimdikten.
«Qazgıdromet» RMK boljamyna sáıkes, 18 naýryzda keıde qatty jańbyr jaýady, ol úzilistermen 20 naýryzǵa deıin boljanady. Aýa temperatýrasy 3-ten 5 gradýsqa deıin ózgeredi.
