Almatyda «jańajyldyq» syılyq alǵan sheneýnikter tekserilip jatyr
ALMATY. QazAqparat - Almatyda qoǵamdyq uıym ókilderi «jańajyldyq» syılyq alǵan sheneýnikterdi áshkereleý maqsatynda memlekettik mekemelerde reıd júrgizip jatyr, dep habarlaıdy QazAqparat tilshisi.
Mundaı qoǵamdyq bastamaǵa www.zannews.kz sybaılas jemqorlyqqa qarsy medıa ortalyq muryndyq bolǵan.
2-3 kúnnen beri arnaıy monıtorıng tobynyń músheleri Almatydaǵy Medeý, Bostandyq, Túrksib, Almaly aýdandyq memlekettik kirister departamentin, Túrksib aýdandyq ákimdigin, qalalyq Qoǵamdyq densaýlyqty saqtaý departamenti, Medeý aýdandyq kóshi-qon polıtsııasy, qalalyq kóshi-qon polıtsııasyn aralap shyqty.
Reıd barysynda qoǵamdyq ókilder tek qana syılyqtardy ǵana emes, memlekettik qyzmet kórsetý sapasyn, azamattardyń aryz-shaǵymyn, múmkindigi shekteýli azamattarǵa qyzmet kórsetýdiń qoljetimdiligin tekserdi.
Aralaý barysynda Medeý aýdandyq Memlekettik kirister departamentinde 4 paket syılyqty basqarma stajeri alyp bara jatqan kezinde áshkerelendi.
Anyqtalǵandaı, basqarma qyzmetkerlerine bank ókilderi qorap kámpıt, sharap, arnaıy kádesyı syılamaq bolǵan.
Bul derekke qatysty mekeme basshysy qyzmettik tekserý júrgizýge ýáde berdi.
Aıta ketý kerek, QR Memlekettik qyzmet isteri jónindegi jáne sybaılas jemqorlyqqa qarsy kúres basqarmasy áleýmettik jelilerde reıd júrgizgen bolatyn.
Atap aıtqanda, 54 745 akkaýnttyń kontenti tekserildi.
2212 qyzmetshiniń akkaýntynda memlekettik qyzmet etıkasyn buzatyn 2300 sýret, 21 vıdeo, 46 kommentarıı baıqalǵan.
Bul fotolardyń kópshiliginde qyzmetshiler ishimdik iship, kóńil kóterip otyrǵany, býkmekerlik keńsede, qumar oıyndaryn oınap otyrǵany kórsetilgen. Bylapyt sóz, erotıkalyq sýretter bar.
Jyl basynan beri 277 memlekettik qyzmetshi tártiptik jaýapkershilikke tartylǵan.
Odan bólek 112 sheneýnik jumys ýaqytynan tys mezgilde qyzmettik kólikti paıdalanǵany úshin jazalandy.
Agenttiktiń habarlaýynsha, memlekettik qyzmetshilerge berilgen quny 3 mln 200 myń bolatyn 317 syılyq arnaıy qorǵa ótkizildi.
Mundaı áreket QR Memlekettik qyzmet týraly zańyn óreskel buzý bolyp tabylady.
