Almatyda jańajyldyq shyrsha men bezendirýge qansha qarjy bólindi

ALMATY. QazAqparat- Almatydaǵy sanıtarlyq-epıdemıologııalyq jaǵdaıdyń turaqsyzdyǵyna baılanysty bıýdjet bekitilgen shekte qysqartyldy. Sondyqtan ekinshi jyl qatarynan qalany merekelik bezendirýge, sondaı-aq mádenı is-sharalardy ótkizýge jumsalatyn shyǵyndar qysqartyldy, dep habarlaıdy QazAqparat tilshisi.

Qalalyq ákimidiktiń málimetinshe, bıyl negizgi bıýdjet qarajaty koronavırýs ınfektsııasymen kúresýge baǵyttaldy.

Osyǵan baılanysty megapolıstegi jańajyldyq bezendirý qarapaıym boldy.

« Dástúrli túrde qalanyń bas shyrshasy QBTÝ mańyndaǵy «Astana» alańynda ornatylady. Sonymen qatar, ınstallıatsııalar qalanyń 8 aýdanynda – ortalyq kóshelerde, aýdan ákimdikteriniń mańynda, jaıaý júrginshiler aımaqtarynda ornatyldy. Tuńǵysh Prezıdent saıabaǵy, Respýblıka saraıy men Tsırk aldyndaǵy alań, Panfılov kóshesi men Saýranbaev kóshesi boıyndaǵy jaıaý júrginshiler aımaǵy, «Almaty Arena», «Halyq Arena» sport keshenderi, Ǵabıt Músirepov jáne Natalııa Sats atyndaǵy orys memlekettik akademııalyq balalar men jasóspirimder teatrynyń mańy merekege saı bezendirildi»,- dep habarlady ákimdikten.

Qalanyń barlyq aýdanynda shyrsha men fotoaımaqtar ornatyldy. Sondaı-aq, ótken jylǵy shaǵyn sáýlet nysandary qoldanylady.

«Almatyda jańa jyldyq bezendirýge bólingen 224 000 000 teńgeni tender arqyly «Clover Media Group» kompanııasy jeńip aldy. Bul somaǵa kóshelerdi jańa jyldyq bezendirý men ornatý jáne demontaj ǵana emes, sonymen qatar Qazaqstan Respýblıkasynyń zańnamasynda kózdelgen barlyq salyqtar kiredi. Qosymsha qun salyǵyn qosa alǵanda – 24 mln teńgeden astam»,- delingen habarlamada.

Kelisim shart aıasynda shyrshalar, shaǵyn arhıtektýralyq pishinder, fotoaımaqtar ornatyldy. Qala kóshelerine barlyǵy 100-den astam nysan daıyndalyp, ornatyldy.

Buǵan deıin Almatyda Jańa jylǵa arnalǵan merekelik otshashý bolmaıtyny týraly habarlaǵan bolatynbyz.