Almatyda "Jańajyldyq marafon" event-festıvali ótedi
ALMATY. 2 qarasha. QazAqparat /Názıra Eleýhan/- Almatyda 9-11 qarasha aralyǵynda "Metro" túngi klýbynda birinshi qalalyq "Jańajyldyq marafon" event-festıvali ótedi. Bul týraly búgin Almatyda Qazaqstandaǵy merekeler men sharalardy uıymdastyrý, bul salany damytý máselelerine arnalǵan baspasóz máslıhatynda atalmysh sharanyń uıymdastyrýshylary málim etti.
"Úsh kún boıǵy festıval barysynda Jańa jylǵa arnaıy daıyndalǵan ártister men mýzykanttardyń jańa nómirleriniń tusaýkeserlerin kóre alasyzdar. Nómirler arasynda kásipqoılarmen qatar, debıýtti, sondaı-aq premeralyq qoıylymdar bolady. Satyp alýshylar, ıaǵnı sharany uıymdastyrýshylar oryndaýshylardyń ózimen, ne bolmasa prodıýsserlerimen tikeleı kezdese alady. Onda ár ártistiń baǵasy ashyq aıtylatyn bolady. Ár kelýshige qatysýshylardyń usynystary men tanys hattar (vızıtkalar) beriledi. Árbir nómir beıne kameraǵa jazylyp Chesnok.kz saıtyna engiziletin bolady",-dedi jobanyń avtory Vıacheslav Nerýsh. Onyń aıtýynsha, bul festıval jańajyldyq korporatıvti sharalardy uıymdastyrýshylarǵa shoý-baǵdarlamalardy quryp, jasaýǵa ne bolmasa basqa da merekelerde jańa qyzyqty nómirlermen kórikteýge kómektesedi.
Uıymdastyrýshylardyń aıtýynsha, festıvalge shynaıy janrdyń ártisteri, mýzykalyq komandalar, perfomans-shoýlar, júrgizýshiler men bıshiler qatysady.
Búginde oǵan 40-tan astam qatysýshylar usynystaryn bildirgen. Olardyń qatarynda Murat Mutyrǵanov, "Dream Ligths" ot shoýy, "Seıshn" art-baleti, "Tango" toby, "Dıana" shoý baleti Sergeı Gýberdiń bı-parodııalyq non-stop shoýy jáne taǵy da basqa ónerpazdar bar.
«Prazdnık» agenttiginiń prezıdenti, «Tımbıldıng» kompanııasynyń dırektory Pavel Tokarchýktyń aıtýynsha, Qazaqstanda shoý-bıznes damýda. "Korporatıvti keshterde shyǵatyn ónerpazdardyń deńgeıi birneshe ret TV-de shyqqan adamdardan joǵary. Talap jyldan jylǵa ósip keledi", -dedi ol.
