Almatyda jańartylǵan 9 ekopost jumys isteı bastady
ALMATY. QazAqparat - Almatyda jańarǵan 9 ekopost jumys isteı bastady, kúzge qaraı taǵy 10-y iske qosylady. Bul týraly Óńirlik kommýnıkatsııalar qyzmetiniń baspasóz konferentsııasynda Almaty qalasynyń Jasyl ekonomıka basqarmasynyń basshysy Natalıa Lıvınskaıa málim etti, dep habarlaıdy QazAqparat tilshisi.
Onyń aıtýynsha, ekoposttar arnaıy qondyrǵylarmen jabdyqtalǵan. Megapolıstegi aýany negizgi lastaýshy - avtokólik, statsıonarlyq kózder jáne jeke sektor. Sońǵy 11 jylda zalaldy shyǵyndar 128 myńnan 70 myń tonnaǵa deıin tómendegen. Al jeke sektordan 16 myńnan 1 myń tonnaǵa deıin azaıdy.
Desekte, statsıonarlyq oryndardyń shyǵaryndylary ósti, bul kórsetkishter JEO-2 jumysyna baılanysty.
«Atmosferadaǵy zalaldy zattardy azaıtý úshin, eń kólikti, qoǵamdyq kólikti ekologııalyq taza janarmaıǵa kóshirý úshin júıeli jumystar júrgizilýde. Barlyq qalalyq avtobýsty gaz ben elektr energııasyna kóshirý jumystary bastaldy. Mysaly, 2020 jyly gazben júretin 150 avtobýs satyp alyndy. Al bıyl gaz ben elektr energııasyn paıdalanatyn qoǵamdyq kólikterdiń 500-ge jýyq birligin satyp alý josparlanyp otyr», - dedi Jasyl ekonomıka basqarmasynyń basshysy.
Onyń pikirinshe, jeke kólikterdi júıeli túrde jańartyp, kólikteri aqaýly jáne qorshaǵan ortaǵa zııandy avtokólik ıelerine shara qoldaný qajet.
«Qalanyń kireberisterine 19 ekologııalyq post ornatý boıynsha jumys júrgizilip jatyr. Búgingide 9 ekologııalyq post quryldy, qalǵan 10 post osy jyldyń kúzine deıin birtindep ornatylady», - dedi Natalıa Lıvınskaıa.
Aıta keterligi, kóktemde qala boıynsha qozǵalatyn júk vagondarynyń ólshemderi alyndy. Tekserý nátıjeleri kórsetkendeı, qalalyqtardyń 11%-y jáne qalaǵa kiretin kólikterdiń 12,6%-y ekologııalyq normalardy saqtamaıdy.
Sonymen qatar, Jasyl ekonomıka basqarmasy lastaýshy avtokólikterdi qala boıynsha qozǵalys kezinde anyqtaıtyn úsh mobıldi posty jáne zerthana satyp alýdy josparlap otyr. Qazirgi ýaqytta konkýrstyq protsedýralar júrip jatyr, jetkizý osy jyldyń sońyna josparlanǵan.
Tehnıkalyq retteý jáne metrologııa departamenti qalada satylatyn otynnyń sapasyn baqylaý jumystaryn bastady. Sondaı-aq, avtokólikterdi tehnıkalyq baıqaýdan ótý tártibin qatańdatý boıynsha sharalar qabyldanyp jatyr.
