Almatyda janarmaı quıý beketine shabýyl jasaldy
ALMATY. QazAqparat- Almatyda janarmaı quıý beketine shabýyl jasaǵan kúdiktiler anyqtaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, kúdiktiler 100 myń teńge men eki telefondy qoldy qylǵan.
«Janarmaı quıý beketine jasalǵan qaraqshylyq shabýyl túngi saǵat ekide bolǵan. Betperde kıgen eki adam qolyna shege sýyrǵysh jáne balta alyp, janar-jaǵarmaı quıý beketine kelgen. Olar kassır men kúzetshini artqy bólmege qamap, qyzmetkerlerdiń telefondary men kassadaǵy aqshany urlap ketken. Shabýyldaýshylardyń búkil áreketi beınebaqylaý kamerasyna jazylyp qalǵan. Kúdiktiler sol kúni anyqtalyp, qamaýǵa alyndy. Bul – 23 jastaǵy T. jáne 22 jastaǵy M. esimdi azamat»,– dedi Medeý aýdandyq polıtsııa basqarmasyna qarasty polıtsııa bóliminiń bastyǵy Elnur Qudretbaev.
Atalǵan derek sotqa deıingi tergeýdiń biryńǵaı tizilimine QR QK 191-baby 2-bóligi boıynsha tirkeldi.
«Kúdiktiler – basqa jaqtan kelgender. Olar Almatyǵa jumysqa ornalasý úshin kelgen, biraq aqsha tabýdyń budan basqa ońaı jolyn oılap tappqan. Shabýyldaýshylar ýaqytsha ustaý ızolıatoryna qamaldy. Polıtsııa qyzmetkerleri olardyń buryn jasalǵan qylmystarǵa qatysy bar-joǵyn tekserip jatyr»,- dedi polıtsııa ókili.
Foto: polisia.kz
