Almatyda janarmaı beketiniń janynan ashana salý jobasy keıin qaıtaryldy
ALMATY. QazAqparat - Almaty bıligi janarmaı stansasyna jaqyn jerde tamaqtaný nysanyn salmaq bolǵan bıznesmenge jobasy keıin qaıtaryldy, dep habarlaıdy QazAqparat tilshisi.
Bul týraly qalalyq Sáýlet jáne qala qurylysy basqarmasynyń Feısbýktegi paraqshasynda jarııalandy.
Basqarmanyń kezekti otyrysynda Sáýlet tehnıkalyq keńesiniń qaraýyna birqatar qurylys jobalary usynylǵan bolatyn.
Keńes músheleri 10 jobanyń 2-eýin ǵana maquldady. Qalǵan joba túrli tehnıkalyq sebeptermen keri qaıtaryldy.
Atap aıtqanda, Naýryzbaı aýdanyndaǵy Dostyq shaǵyn aýdanynda medıtsınalyq mekemeniń qurylysy maquldandy. Bolashaqta bul jerde avtoturaǵy bar emhana paıda bolmaq.
Sonymen qatar, keńes músheleri Gagarın kóshesiniń boıyndaǵy biryńǵaı baılanys ortalyǵynyń qurylysyn qoldady.
Al Medeý aýdanyndaǵy KMEBI ǵımaratynyń qaıta jańǵyrtý jobasy qaıtadan qaraýǵa jiberildi.
Al, Áýezov aýdanynda Pıatnıtskıı kóshesindegi dúken qurylysy, Almaly aýdanyndaǵy Maqataev kóshesinde kópfýnktsıonaldy úı kesheniniń qurylysy, Bostandyq aýdanyndaǵy «Ermensaı» jerasty turaǵy bar turǵyn úı qurylysy, Mınýsınskaıa kóshesinde 9 qabatty bıznes ortalyǵynyń qurylysyna tyıym salyndy.
Sarapshylar bul jobalarǵa tym kóp jer talap etiletinin alǵa tartty.
Medeý aýdanyndaǵy Ál-Farabı dańǵylyndaǵy mekteptiń ashanasynda qosymsha ǵımarat salý jobasy qaıta qaraýǵa jiberildi. Óıtkeni, ǵımarat menshik quqyǵynan asyp ketedi.
Sonymen qatar, Túrksib aýdanyndaǵy Maılın kóshesinde tamaqtaný ornyn salmaq bolǵan ınvestor jobasy keıin qaıtaryldy.
Bıznesmen nysannyń janarmaı stansasynan 50 metr qashyq bolýy tıistigin qadaǵalamaǵan.
Aıta ketý kerek, Sáýlet tehnıkalyq keńesi 30 qazanda 2017 jyly qurylǵan bolatyn.
Uıym júıeli túrde talqylanǵan jobalardy jarııalap otyrady.
