Almatyda jańadan ashylǵan sport alańynda Sport kúni atap ótildi

ALMATY. QazAqparat - Almatyda Bıokombınat saıabaǵynda ashylǵan jańa sport alańynda Sport kúni atap ótildi. Oǵan Almaty qalasy, Almaly aýdany ákimdiginiń ókilderi, jergilikti turǵyndar, jastar, balalar men jasóspirimder qatysty.

«Búgingi sharanyń basty maqsaty - turǵyndardy salamatty ómir saltyn ustanýǵa shaqyrý jáne jastar arasynda ulttyq sport túrleri men buqaralyq sport túrlerin keńinen nasıhattaý. Almaty qalasynyń 1000 jyldyǵyna oraı ashylǵan bul úlken sport alańynda endi kez-kelgen ýaqytta fýtbol, basketbol, voleıbol oınaýǵa, «vorkaýtpen» jáne basqa da sport túrlerimen aınalysýǵa bolady. Bul sport alańyn memlekettik-jeke menshik áriptestik aıasynda «Etalon» JShS qalaǵa syıǵa tartty», - dedi óz sózinde atalmysh sharany uıymdastyrýshy Almaty qalasynyń Almaly aýdandyq ákimdiginiń mádenıet jáne tilderdi damytý bóliminiń bas mamany Aqsuńqar Ábiltaeva.

Al, jergilikti aýmaqtyń turǵyndary da, jastar da demalys ortalyǵynyń osylaı kóriktendirilgenine asa rızashylyqtaryn bildirdi.

Shara barysynda 12-14 jas aralyǵyndaǵy jasóspirimder arasynda mını-fýtboldan jarys ótkizildi. Oǵan 60-qa jýyq jasóspirim  qatysty. Barlyǵy 8 komanda baq synasyp, júldegerlerdi anyqtady. «Bıokombınat» aýla klýby birinshi oryndy ıelendi.

Sport alańynda sondaı-aq, ulttyq sport oıyndaryn jastar arasynda keńinen nasıhattaý maqsatynda qazaqsha kúres, arqan tartys, asyq oınaý sekildi oıyndar uıymdastyryldy.