Almatyda jańadan 9 sýburqaq salynady
ALMATY. QazAqparat - Almatyda jańadan 9 sýburqaq salynbaq. Sonymen qatar shahardaǵy ózge sýburqaqtar qaıta jóndeýden ótetin bolady. Bul qalanyń kórkin árlendirý baǵytyndaǵy sharalardyń aıasynda qolǵa alynyp otyrǵan jumystar, dep habarlaıdy QazAqparat tilshisi.
Almaty ákimi Baýyrjan Baıbek qalanyń tarıhı ortalyǵyn jańartý barysynda eskirgen fontandardy qalpyna keltirý týraly tapsyrma bergen bolatyn.
Jańa fontandar Abaı, Nazarbaev, Abylaı han dańǵyldary men Gogol, Jibek Joly, Mámetova jáne Raıymbek kósheleriniń arasynda boı kóteredi. Al Ulttyq kitaphana, «Jetisý» qonaqúıi, Abylaı han men Shevchenko kósheleriniń qıylysyndaǵy jáne basqa da jerlerdegi burynnan bar sýburqaqtardy qaıta jóndeý josparlanǵan.
«Basseın ydysy sııaqty dástúrli fontandarmen qatar «qurǵaq» sýburqaqtar da iske qosylýda, munda aınalmaly sý júıesi, sýdyń bıiktigi eskerilgen. Túrli projektorlar arqyly galogendi jáne júzgish shyraq syndy jaryq kózderi ornatylady», - dep atap ótti Almaty qalasy ákimdiginiń baspasóz qyzmetinen.
Qaıta jańarǵan Panfılov, Jibek Joly, Gogol, Qabanbaı batyr, Baıseıitova, Tólebaev kósheleri men «Astana» alańyna qosa, bıylǵy jyly megapolıstegi birqatar dańǵyldyń jańa tynysy ashylmaq. Ortalyqtandyrý qaǵıdasyna sáıkes qalanyń barlyq aýdandarynda abattandyrý jumystary júrýde. Ótken jyly 455 aýla jańarsa, 2018 jyly qosymsha 585 aýlany jóndeý kútilýde. 
Sońǵy jyldary megapolıste 180 km jol jáne 700 km ınjenerlik jeliler salynyp, jóndeldi, birqatar jolaıryqtardyń qurylystary júrýde, magıstraldy kósheler qazylýda. Sondaı-aq bıyl uzyndyǵy 155 shaqyrym bolatyn 157 kóshe men 30 shaqyrymnan asatyn jaıaý júrginshiler jolyn jóndeý josparlanǵan.
Araılym Jodasbaeva
