Almatyda Jańa jyldyq mereke kúnderi birqalypty, tynysh ótti - ІІD
ALMATY. 5 qańtar. QazAqparat /Názıra Eleýhan/ - Almatyda Jańa jyldyq mereke kúnderi birqalypty, tynysh ótti. Qala boıynsha qylmystyq is kólemi az tirkeldi, dep habarlaıdy qalalyq ІІD-niń baspasóz qyzmeti.
Almaty qalasy ІІD-niń qoǵamdyq qaýipsizdik basqarmasy bastyǵynyń orynbasary, polıtsııa polkovnıgi Serik Qazybaevtyń aıtýynsha, bul kúnderi Almaty polıtseıleri kúsheıtilgen keste boıynsha jumys istep, jalpy sany eki myńǵa jýyq polıtsııa qyzmetkerleri qoǵamdyq tártip pen qaýipsizdikti qamtamasyz etken. «31 qańtar kúni 11 qylmys jasaldy, onyń 9-y izi sýymaı turyp ashyldy. Polıtsııa qyzmetkerleri bir zorlaýshyny, tórt tonaýshyny, alty urlyqshyny ustady, Onyń tórteýi páterlerdi tonaǵan. Biz ótken jylǵy tájirıbeni eskere otyryp, bıyl keshendi jumys kúshterin ulǵaıttyq. Ásirese turǵyn úıler men adamdar kóp shoǵyrlanǵan jerlerdi baqylaýǵa aldyq. Bul tarapta «Qaýipsiz aýla» baǵdarlamasy tıimdiligin kórsetti», - dedi ol.
Onyń aıtýynsha, mereke kúnderi 18 jastaǵy K. esimdi kólik urlaýshy anyqtalyp, ustalǵan. «Ol Jańa jyl túni «Leksýs» avtokóligin urlaý barysynda quryqtaldy. Taba almaı júrgen kólik urlaýshy bizdiń jol polıtsııa jáne krımınaldyq polıtsııa qyzmetkerleriniń kásibı sheberliginiń arqasynda ustaldy», - dep atap ótti ol.
