Almatyda jańa jyldan bastap keıbir qalalyq avtokólik baǵyttary ózgeriske ushyraıtyn bolady
ALMATY. 22 jeltoqsan. QazAqparat /Názıra Eleýhan/ - Almatyda Kólik jáne kommýnıkatsııa ǵylymı-zertteý ınstıtýty mamandary Almaty qalasynyń ákimi Ahmetjan Esimovke qalalyq avtokólik baǵyttaryna ózgeris engizilgen jańa jospardy usyndy.
Jańa júıege baılanysty kelesi jyldan bastap keıbir qalalyq avtokólik baǵyttary birtindep ózgeriske ushyraıtyn bolady, dep habarlaıdy qala ákimdiginiń baspasóz qyzmeti.
Sońǵy ýaqytta Almaty qalasynyń keń qanat jaıyp damýy men metropolıtenniń birinshi kezeginiń iske qosylýyna baılanysty «Kólik jáne kommýnıkatsııa ǵylymı-zertteý ınstıtýty» JShS mamandary qala kólik baǵytyn jetildirý maqsatynda zertteý jumystaryn júrgizýde. Sonyń nátıjesinde aldaǵy ýaqytta kólik jyldamdyǵy artyp, keıbir baǵyttar boıynsha avtobýstar sany da azaıatyn bolady.
Búginde úlken megapolıste qala kóshelerine túsetin salmaqty azaıtý boıynsha syrttan keletin qoǵamdyq kólikterge arnalǵan jańa aınalma alańdar da salynýda. Jańa alań ekologııalyq talaptarǵa saı kelmeıtin aımaqtyq avtobýstar men baǵyttyq kólikter sanynyń azaıýyna yqpal etpek. Qalaǵa kiretin kólikter osy aınalma alańdarda jolaýshylar men júkterdi qaldyryp, ortalyqqa kirmeı, keri qaıtarylatyn bolady. Mamandardyń aıtýynsha, ol qaladaǵy kólik keptelisin azaıtýmen qatar, aýanyń lastanýyn kemitýge yqpal etpek.
Jyl boıyna qala ákimdigi men arnaıy sarapshylarǵa qala turǵyndarynan kólik baǵyttaryn jaqsartý men ózgertý týraly usynystar jıi túsedi. Jaqyn arada, atap aıtqanda 26 jeltoqsan kúni Almaty qalasy ákiminiń tóraǵalyq etýimen osy máselege baılanysty arnaıy jıyn ótetin bolady.
