Almatyda Jańa jyl merekesi qarsańynda azyq-túlik baǵasy turaqty - ákimdik
ALMATY. QazAqparat - Almatyda Jańa jyl merekesiniń aldynda baǵalardyń kúrt ósýi baıqalmaıdy, dep habarlaıdy «QazAqparat» HAA qalanyń aýyl sharýashylyǵy basqarmasyna silteme jasap.
«Merkeniń aldynda suranystyń artýyna baılanysty baǵanyń da azdap qubylýy yqtımal. Jalpy alǵanda, azyq-túlik baǵasyna degen ortasha kórsetkish turaqty. Bir aptaǵa jasalǵan monıtorıng boıynsha, jumyrtqanyń baǵasy 0,6%, sary maı baǵasy 0,5% ǵana artqan»,-delingen vedomstvonyń habarlamasynda.
Bul rette keıbir azyq-túlik túrlerine baǵanyń kerisinshe, tómendeýi baıqalady. Aıtalyq oramjapyraq baǵasy 2,9%, sábiz ben qant baǵasy 1% tómendegen.
«Sondaı-aq osyǵan deıin jasalǵan azyq-túlik baǵasyn shekti deńgeıden asyrmaý jónindegi kelisimderge sáıkes, jylyjaı ónimderiniń quny burynǵy deńgeıde qalyp otyr. Aıtalyq, jergilikti óndirýshilerdiń qyzanaqtary kelisine 500 teńgeden, qyzyl burysh - 750, qııar 600 teńgeden saýdalanyp jatyr»,-dep qosty basqarma ókilderi.
Merekelerdiń qarsańynda aýyl sharýashylyǵy basqarmasynyń ókilderi azyq-túlik dúkenderi men qalanyń 17 bazarymen baǵalardy negizsiz ósirmeý boıynsha tıisti jumystar júrgizýde.
Sondaı-aq demalys kúnderi ótetin aýyl sharýashylyǵy ónimderiniń jármeńkesi jeltoqsannyń 31-ne deıin sozylatyndyǵy habarlandy.
Maıa Teńizbaeva
