Almatyda jańa jolaıryqtar paıda bolady
ALMATY. QazAqparat - Almaty ákimi Baýyrjan Baıbek jańa kólik jolaıryqtarynyń qurylysyn tekserip, Abaı men Nazarbaev dańǵyldaryn odan ári úńgileý jumystarymen tanysty, dep habarlaıdy QazAqparat tilshisi.
Qala ákiminiń aıtýynsha, Nazarbaev dańǵylyn Jansúgirov kóshesine deıin sozý «Soltústik - Ońtústik» baǵytynda Seıfýllın dańǵyly boıynsha kólik júktemesin edáýir azaıtady.
«Qala ınfraqurylymyn damytýda keshendi ádistiń mańyzy zor. Eger ortalyq kósheler júrginshiler qalaýyna saı qaıta jańarsa, al qala aınalasynda kólik qozǵalysynyń legi úshin qajetti jaǵdaıdy jasaǵan jón», - dedi Baýyrjan Baıbek.
Qazirgi kezde munda estakada qabyrǵalaryn montajdaý jáne nysannyń tirekterin jasaý jumystary júrýde. Osy ýchaskede kólik qozǵalysyn belgilengen merzimnen eki aı buryn, ıaǵnı qazan aıynda ashý josparlanǵan. Al Seıfýllın dańǵyly men Jansúgirov kóshesi boıyna jolaıryq salý kólik qozǵalysy legin 20%-ǵa arttyrady. Qurylys 2019 jyldyń tórtinshi toqsanynda aıaqtalmaq.
Rysqulov dańǵyly men Qulja traktisiniń qıylysynda da jańa jolaıryǵy salynýda, bul soltústik-shyǵys baǵyttaǵy kishi kólik aınalymynyń kólik ótkizý qabiletin arttyrady. Qazirgi kezde munda estakada tireýiniń astyna óndiris qondyrǵylary ornatylyp, ınjenerlik jeliler qaıta aýystyrylýda. Rysqulov dańǵyly men Emtsov kóshesi boıynda da jańa jolaıryq boı kóterýde.
Qala ákimdigi baspasóz qyzmetiniń habarlaýynsha, bıyl megapolıste birqatar negizgi dańǵyldar jańarady. Qalanyń barlyq aýdandarynda150-den astam kóshe, 600 aýla qaıta jóndeýden ótedi.
«Naýryzbaı aýdanyn ortalyqpen qosý úshin Shalıapın jáne Jandosov kóshelerine basymdyq beriledi, Abaı dańǵylyn Áshimov kóshesinen qala shekarasyna deıin úńgileý jumystary jalǵasady», - dep málimdedi qala ákimdigi baspasóz qyzmetinen.
Araılym Joldasbaeva
