Almatyda jańa jolaıryq salynady – ákimdik
ALMATY. QazAqparat - Almatyda taǵy bir jolaıryq salynady. Bul týraly qalalyq mobıldik basqarma basshysynyń orynbasary Ernur Abjahan málim etti, dep habarlaıdy QazAqparat tilshisi.
Megapolıstegi jańa jolaıryq Móńke bı men Saın kósheleriniń qıylysynda salynady. Qazirgi ýaqytta jobalyq-smetalyq qujat daıyn. Jol qurylysy bıyl bastalady.
«Móńke bı men Saın kóshesiniń qıylysynda jolaıryq paıda bolady. Bul Úlken Almaty aınalma avtojolyna shyǵatyn joldar. Sondyqtan oǵan shyǵatyn eki úlken magıstralda kólik júktemesi bolmas úshin jolaıryq salý josparlandy», - dedi qalalyq mobıldik basqarmasy basshysynyń orynbasary Ernur Abjahan.
Sondaı-aq, eki jolaqty jergilikti ótpe joldar qurylysy josparlanǵan. Rysqulov dańǵylynan Móńke bı kóshesine deıin jaıaý júrginshiler jáne velosıped joldary salynady.
